San Tomaserako txosna eskaera ostirala baino lehen egin behar da
Sei postu zozkatuko dira azaroaren 24an eta eskatu dutenek zozketan egon beharko dute. Nekazarien postuetarako eskakizunak, berriz, azaroaren 25 bitarte egin daitezke.
Udalak onartu du jada San Tomas eguneko azokan parte hartzeko oinarriak eta jakinrazi du txosna jartzeko eskabidea aurkezteko epea ostiral honetan bukatuko dela, hilak 10.
Eskakizunak betetzen dituzten Irungo kultur, kirol eta gizarte arloko entitate eta elkarteek eta aisialdikoek eman dezakete izena deialdian, eta hori bide elektronikoa baliatuz egin beharko dute, edota HAZen, Irun Txartela, NAN elektronikoa edo Izenperen ziurtagiri elektronikoa erabiliz, edo autozerbitzu terminalen bitartez, Palmera-Montero Gunean.
Terminalen ordutegia astelehenetik ostiralera bitartekoa da, 08:00etatik 22:00etara, eta larunbat eta igandeetan, 10:00etatik 14:00etara eta 16:00etatik 20:00etara (jaiegunetan itxita dago). Anakan eta Katean posible dute Kutxabankek bulegoetan egin, haien ordutegien barruan.
Behin-behineko zerrenda azaroaren 17an argitaratuko dute, Kultura eta Kirol Arloaren bulegoetan, Herritarrentzako Arreta Zerbitzuarenetan eta Interneten, udalaren orrialdean. Ordutik, hiru egun natural ezarri dituzte alegazioak aurkezteko. Epe hori bukatzerakoan erreklamaziorik jaso ezean, behin behineko zerrendak behin betiko itxiko dituzte; eta erreklamaziorik egotekotan, azaroaren 24an emango dute ebazpenaren berri.
Zozketa, azaroaren 24an
Zozketa jendaurrean egingo dela azaldu du udalak, azaroaren 24an, ostiralarekin, 19:00etan, Amaia KZko hitzaldi aretoan, eta eskatzaileek bertan egon beharko dute, bai ala bai. Hala, sei postu esleituko direla gehienez nabarmendu du udalak.
Onartzen dituzten eskabideak lau taldetan sailkatuko dituzte: Kultur elkarteen eskabideak; Kirol elkarteenak; Gazte elkarteenak eta ikastetxeenak; Elkarte sozialenak eta gobernuz kanpoko erakundeenak.
Oinarriak (eskakizunak, epea eta aurkeztu beharreko dokumentazioa) Herritarrentzako Arreta Zerbitzuaren bulegoetan (San Martzial karrikako 2 zenbakian) eta Udalaren webgunean eskuratu daitezke, eta eskabideak Herritarrentzako Arreta Zerbitzuaren bulegoetan aurkeztu behar dira.
Nekazaritzako produktuen salmenta
Bestalde, nekazaritzako elikagaiak erakutsi eta saltzeko postuak jartzeko eskabideak aurkezteko epea azaroaren 25ean bukatuko da. Orotara hogei eta bi postu jarriko dira gehienez ere, lau ataletan banatuta: barazki eta fruituak, loreak eta landareak; produktu landuak; eta abereak.
