Elkartasuna adierazi diote Palestinari Irunen
Gernika-Palestina Herri Ekimenak deituta, irundarrak ere udaletxe aurrean elkartu dira Palestinari elkartasuna adierazteko.
Gernika-Palestinak egindako deiarekin bat egin eta elkarretaratzea egin dute, gaur, Irungo San Juan plazan. Euskal Herri osora zabaldu den deialdia da eta goizean ikastetxeen atarian bildu badira, arratsaldeko 19:00etan udaletxe aurrean elkartu dira.
Urriaren 21ean manifestazio nazionala egin zuten Donostian, Gernika-Palestina taldeak deituta, eta orduan ateratako irakurketari eutsi diote oraingoan ere. Honako hauek dira egiten dituzten aldarrikapenak:
1. Berehalako su-etena eskatzen dugu, eraso guztien amaiera eta zibilen bizia eta segurtasuna bermatzea.
2. Halaber, Gazako zerrendaren setioarekin eta, oro har, Palestinako lurraldearen gaineko mehatxuarekin bukatzea eskatzen dugu, bai eta laguntza humanitarioaren sarrera ahalbidetzea ere.
3. Herritar palestinar eta israeldarrek bakean bizitzeko eskubidea dutela uste dugu.
4. Konponbide baketsu eta negoziatua bilatzeko deia luzatzen diegu alde guztiei eta nazioarteko komunitateari; Nazioarteko Zuzenbidean eta NBEren ebazpenen betearazte zorrotzean oinarritzen den konponbidea, alegia.
5. Horretarako premiazkoa da elkarrizketa prozesu bat abiatzea. Bake justu, egonkor eta iraunkorra helburu, nahitaezkoa da okupazioari amaiera ematea eta Palestinaren autodeterminazio eskubidea bermatzea.
Irun eta Palestina
Gaur hilabete bete da Israelek Gazaren kontrako bonbardaketa geldiezina abiatu zuenetik, eta gaurko elkarretaratzea Irunen egin den hirugarrena izan da. Bide horretan, larunbat honetarako manifestazio nazionala antolatu dute, 12:00etan Hendaiako tren geltokitik mugara abiatuko dira, eta Irun zeharkatu ondoren, amaiera CAF enpresa izango da.
Urriko osoko bilkuran udalbatzak mozio bat onartu zuen Palestina eta Israelen arteko “gertaeren harira” . Mozioa PP, EAJ eta PSEE-EEk adostutakoa izan zen eta EH Bilduk eta Elkarrekin Irunek kontra bozkatu zuten. Azken bi koalizioek mozio alternatu bateratua aurkeztu zuten.
