Zortzi hilabetean bukatuko dituzte Gaztainondo kaleko igogailuko lanak
Udalak jakinarazi du lan horien zatirik zailenarekin bukatzear direla. 20 plazakoa izango da, eta Gaztainondo eta Geltoki kaleak batuko ditu.
Lanak, gaur bertako irudian. Gaztainondo kaleko igogailuaren obrako zatirik zailena bukatzear dela jakinarazi du Irungo Udalak. Lan horiek zimendatzekoak eta obra zibilekoak dira. Hala, irisgarritasun azpiegitura zortzi hilabetean martxan izan daitekeela aurreratu du udal erakundeak Gaztainondo kalearen hasiera (5. zenbakiaren inguruan) eta Geltoki kalea batuko ditu hango irisgarritasun arazoei aurre egiteko.
20 lagunentzako tokia izango du igogailuak, eta hain handia izatearen arrazoia eman du udalak: bi kale horien arteko lotura izateaz gain, nazioarteko geltoki berrirako baliagarri izango da.
Udalak adierazi du auzotarren eskariari jarraituz egiten ari direla hirigintza lana. Ez da nolanahikoa gainera. 1.200 metro koadroko eremuan eragiten ari dira lanak, eta azpiegitura bera egiteaz gain, inguruko espaloiak zabalduko dituzte, ilarako aparkalekuak kenduz. Lanek, osotara, 880.583,71 euroko kostua dute. “Obran honen oinarrian dauden irizpideak iraunkortasuna, guztien irisgarritasuna eta genero ikuspegia dira, puntu ilun bat desagerraraziko baita”, zehaztu du udalak.
