Cuetara: "Dinamika honekin jarraitu behar dugu"
Bidasoa Irun une gozoa bizitzen ari da. Sailkapeneko bigarren postuan dira, eta galdu gabe dira oraindik. Bolada on horri jarraipena emateko aukera izango dute larunbatean Artalekun Navaren aurka, 17:30ean.
Argazkia: Bidasoa Irun. Bidasoa Irun une gozoa bizitzen ari da. Asobal Ligako sei jardunaldi jokatuta, irundarrak sailkapeneko bigarren postuan dira hamaika punturekin, eta oraindik galdu gabe dira. Dinamika ezin hobean dira Jacobo Cuetararen mutilak, eta bide horretan jarraitu nahi dute. Larunbatean izango dute bolada on horri jarraipena emateko aukera. Artalekun jokatuko dute, Viveros Herol Nava taldearen aurka, 17:30ean. Larunbateko aurkaria sailkapeneko bederatzigarren postuan da sei punturekin, eta ligako azken partida irabazita iritsiko da Artalekura.
Bidasoarren denboraldi hasiera bikaina izan da, eta Jacobo Cuetarak dinamika onarekin jarraitu nahi du: “Bukaerara arte estu joan daitekeen partida batekin egin dezakegu topo, eta hori ez gertatzean jarri behar dugu arreta; eta gertatzen bada, bi puntuak atera behar ditugu, hori baita garrantzitsuena. Ea partida ona egiten dugun eta garaipenen dinamika honekin jarraitzen dugun”.
Orain arteko ibilbidea aparta izan bada ere, Cuetara ziur da partida bakoitza ezberdina dela: “Partida bakoitza aldatzen da. Iaz hogei golengatik irabazi genion Blendio Sinfin taldeari eta gero bere etxean galdu genuen. Oso pozik gaude azken bi neurketetako errendimenduarekin, baina badakigu partida bakoitza ezberdina dela”.
Larunbatean bi puntuak etxean uzteko, Cuetarak argi du bidasoarrek jarraitu beharko duten bidea: “Partida guztiak dira garrantzitsuak, aurkari guztietan ikusten dugu konplexutasun bat. Etxean jokatzen dugu eta, jakina, faboritoak gara horregatik, bigarren izateagatik, etxean jokatzeagatik eta gauden egoeragatik; baina ondo jokatu behar da eskubaloian, maila ona eman behar da ligako neurketak irabazteko. Aurretik irabazi ditugun norgehiagokek edo nola jokatu dugun horietan ez digute garaipenik emango. Partida ona egin beharko dugu, zentratuta egon, eta neurketa ondo prestatu. Espero dugu zaleek gure alde egitea taldearen martxagatik eta ahalik eta babes handiena ematea, oraindik ere oso garrantzitsuak diren bi puntu ateratzeko, ligako partida guztiak bezala”.
