Familien errealitate berriak kontuan hartzen dituen hobariak nahi ditu EAJk
Irungo alderdi jeltzaleak udaleko Ogasun ordezkariei eta udal gobernuari ordenantza fiskaletan familia ugari bereziak eta guraso bakarrekoak kontuan har ditzala eskatu die.
Iragan astean Irungo EAJk hiriko ordenantza fiskaletan jasota ez dauden familiei zuzendutako hobari berriak udal gobernuari proposatzeko asmoa adierazi zuen.
Familia ugarientzako laguntzez hitz egiteko, hiriko alderdi jeltzaleak bilerak egin ditu Irungo Udaleko Ogasun ordezkariekin. Bilkura horretan ondasun higiezinen eta ibilgailuen zergan hobari berriak sortu behar direla eskatu zuten EAJko ordezkariek. Horrez gain, guraso bakarreko familientzako udal tasa ezberdinetan eta Gipuzkoako Foru Aldundiak aitortutako hainbat tasa berezitan ere hobariak eskatu zituzten.
Era berean, jeltzaleek gogorarazi dute aldundiarena dela hiru seme-alaba edo gehiago dituenari familia ugariaren titulua emateko eskumena, “izan familia ugariak, ezkontza bakarreko familia berezi ugariak edo berrosatuak”.
Laguntzak eskatzeko eskaera dokumentazioa ikusita, nahiz eta egungo ordenantzek familia ugarientzako hobaria jaso, eskaera “familia ugari sinpleetara” mugatzen dela jakinarazi du Irungo EAJk; ondorioz, “eredu klasikoetan” oinarritzen dela esan dute, eta eredu horietan “familia liburu bakarra” ematen dela gaineratu dute, “urte askotarako aurreikusitako iraungipenarekin”.
Egungo errealitatean, aldundiak identifikatutako eta bildutako iraungitze laburreko familia liburuak dituzten familiak ere badirela nabarmendu du alderdi jeltzaleak, eta familia horiek hobari horien onuradun izan ezin daitezkeela zehaztu dute.
Hori dela eta, egindako bilkuran “malgutasun handiagoa” eskatu zion Irungo EAJk udal gobernuari; esaterako, familia berrituentzat: “Irungo familia horiek hobari horiek eskatzeko eta lortzeko egiaztagiriak aurkezteko epeak aldatzea”.
Azkenik, hiriko alderdi jeltzaleak familia ugari berezien tarteak ere kontuan hartzea eskatzen du, hau da, “bost seme-alaba edo gehiago dituzten familia unitateak edo, kasu batzuetan, lau seme-alaba dituztenak, eta guraso bakarreko familien kasuak” aztertzea. Jeltzaleen asmoa da familia eredu horiek “udalaren zergetan eta tasetan laguntza eta hobari horiek” jasotzea.
