Larreaundi-Olaberriko auzo plana aurkeztuko dute larunbat honetan
Auzo elkartean, auzoaren "agenda" izango dena aurkeztuko dute, 11:30ean. Gero, udal gobernuari aurkeztea dute asmo.
Larreaundiko Auzo Elkartean aurkeztuko dute larunbat honetan, 11:30ean, Olaberria-Larreaundiri dagokion auzo plana. Auzo Elkartean egin dute hitzordua (Iñigo de Loiola kalea, 9 zenbakia).
Auzotarren parte hartzearekin osatu dute auzo elkartekoek eta orain haiei aurkezteko momentua da. Gero, udal gobernuari eta udalbatza osatzen duten alderdiei erakusteko asmoa dute.
Elkartekoek diote auzo plana tresna garrantzitsua izango dela hurrengo urteetan auzo elkartearentzako, “udalari aldarrikapenak eta beharrak helarazteko eta auzotik ere eragiteko. Labur esateko, gure auzoa hobetzeko agenda nagusia izango da”.
