EAJk salatu du Irungo errotuloen %9 dela soilik euskaraz
Udal gobernuari "euskararen aldeko inplikazio eta apustu handiagoa" galdegin dio EAJk. Euskararen politiketan "espedientea betetzea" egotzi diote ere udal gobernuari.
Euskararen presentzia kalean garrantzitsua dela ildo hartu eta hiriko establezimenduen errotuluetan haren falta salatu du Irungo EAJk. “Tamalgarria” dela Irun “Euskal Herriaren bihotzean egonik, bi izenen ibaiak bustita” hizkuntza paisaia gris eta despertsonalizatu batean egotea deitoratu dute jeltzaleek.
“XXI. mendean, euskaraz hitz egitea, izendatzea, errotulatzea altxor bizia sustatzea eta sortzea” dela diote eta udal gobernuari euskararen aldeko “inplikazio eta apustu handiagoa” eskatu diote. Izan ere, Euskara Sailak egindako ikerketaren arabera, Irungo 4 errotuluetatik batek baino ez du euskararen presentzia. Hain zuzen, “errotuluen %56a gaztelaniaz dago, %14a elebitan eta %9a euskaraz” .
Udalak hizkuntza paisaia euskalduntzeko diru laguntza lerro bat atera zuen eta EAJk iturri ofizialetan kontsulatu ondoren jakin du 13 pertsonak soilik jaso dutela laguntza hori. Hizkuntza politiketan “espedientea betetzea” egotzi diote udal gobernuari, “eta urtez urte gauza bera egiten jarraitzea eta kito”.
Gobernatzea “herritarrak gidatzea” dela iritzi dute, “etorkizuna, aurrerapena, aniztasuna, jarraitutasuna eta justizia” dituen oholtza batera. Azkenik, euskararen oinordekok zuzenak izatea “zorioneko” izatekoa dela adierazi dute eta hizkuntza bizirik mantentzeko ardura “gurea” dela oroitarazi dute.
