Polinizatzaileen jarduera errepikatuko du Lapurriturrik
Jenderengan izandako "harrera beroaren" ondoren, 'Polinizatzaileen pista jokoa' jarduera berreskuratuko dute hilaren 30ean, 11:00etan. Izen-emateak hilaren 16tik 27ra egin behar dira.
Lapurriturriko Informazio Gunea proposamen ezagun batekin dator iraila bukatzeko, ‘Polinizatzaileen pista jokoa’ jarduera berreskuratu baitu hilaren 30erako. Polinizatzaileak ardatz dituen jarduera berriro errepikatuko da hil honetako azken larunbatean uztailaren 15ean izandako “harrera beroaren” ondoren. Irteera 11:00etan hasiko da Lapurriturriko Informazio Gunetik.
Oinez egindako ibilbide baten bidez, parte hartzaileek “bertatik bertara” ezagutu ahal izango dituzte Lapurriturri inguruko bide bazterretan aurki daitezkeen izaki bizidunak. Izaki horien artean, polinizatzaileen garrantzia nabarmenduko dela jakinarazi dute antolatzaileek.
Oinezko ibilbidean zehar pista joko bat egingo dutela aurreratu du udalak. Joko horretan, izaki bizidunen irudiak eta izenak erlazionatu, animalia bakoitza habitatean kokatu edota erle eta liztor motak bereizi beharko dituzte parte hartzaileek. Jolasa bukatzean, joko dinamiko baten bidez errepaso bat egingo dela nabarmendu dute.
Polinizatzaileen inguruko jarduera herritar guztiei zuzenduta dagoela baietsi du udalak, batez ere 6 eta 10 urte bitarteko haurrak dituzten familiei. Izen-emateei dagokionean, hilaren 16tik 27ra egin behar dira, 010 telefonora deituz edo Irungo Udalaren webgunearen bidez.
Bien bitartean, bihar mineralen tailer bat egingo da Lapurriturrin, eta arroka eta bertaratzen direnek mineralak ezagutuko dituzte.
