Goiko postuetan egonkortuta
Lidertza galdu duten arren asteburu ona izan da hondarribiarrentzat. B ontzia 9. izan da Plentzian eta emakumezkoek atsedena izan dute.
Sestaoko estropadaren irteera momentua. Argazkia: Josu Z. Joan den asteburuan Bilbon eskuratutako lidertza galdu duen arren, pozik egoteko moduko asteburua egin du Ama Guadalupekoak. Garesti, oso garesti dago aurten Euskolabel Ligan bandera irabaztea. Horregatik, estropada bakoitzean sailkapeneko aurreneko postuetan mantentzea emaitza bikaina da. Jardunaldiz jardunaldi postuen dantza handia gertatzen ari da eta ligako ontzi erregularren artean daude hondarribiarrak.
Asteburuko bi jardunaldietan Urdaibaik eskuratu zuen garaipena. Larunbatean, Sestaon, kaleen arteko diferentzia nabaria izan zen hasieran eta sailkapenaren behekaldean dantza ugari egon zen. Korrontearen indarra gutxitu ahala, txandaz txanda, kaleen arteko diferentziak berdinduz joan ziren. Ohorezko txandan, Donostiarra nagusitu zen estropadako lehen hiru luzeetan, hondarribiarrek gertu jarraitzen zutelarik. Azken luzean, baina, estropada ordena zeharo aldatu zen eta laugarren luzeko azken metroetan erabaki ziren lehen, bigarren eta hirugarren postuak. Urdaibaik aurrea hartu zuen eta hondarribiarrak bigarren postuari eusten saiatu ziren arren, 48 ehunengatik hirugarren helmugaratu ziren. Zierbena izan zen bigarren sailkatua.
Igandean, Castron (Kantabria) aritu ziren eta estropadaren lehen hiru laurdenetan Zierbenarekin borrokan ibili ondoren, azken luzean atzean uztea lortu zuten berdeek. Garailearengatik zortzi segundora heldu ziren, bigarren sailkatuz. Sailkapen orokorrean lidertza galdu eta bigarren kokatu dira, Urdaibaitik, liderretik, puntu bakarrera. Datorren estropadak Getxon eta Santurtzin izango dituzte.
B ontzia
B ontziko arraunlariak Bizkaian izan ziren. Larunbat arratsaldean jokatu zen asteburuko jardunaldi bakarra, Plentziako XXXIV. Ikurriña estropada. Hondarribiarrek 9. amaitu zuten joan den astean bezala beren txanda irabaziz. Atzean utzi zituzten Deusto, Busturialdea eta Castro ontziak. Sailkapen orokorrean 9. dira ere. Datorren estropada Camargon (Kantabria) izango dute.
