V. edizioa izango du gazteria, haurtzaroa eta nerabezaroa ikertzeko bekak
8.000 euroko laguntzarekin bultzatzen du ikerketa Irungo Udalak. Proiektuak urriaren 5a bitarte aurkez daitezke, bakarka edo taldean.
Haurtzaroa, nerabezaroa eta gaztaroa ikertzeko Gazteartean ikerketa bekak bosgarren edizioa izango du. Diru-laguntza hau 35 urtetik beherakoentzat da, eta helburuetako bat sortu berriak diren ekimenak autonomiko garatzeko laguntza ematea da, baita gazteen artean ikertze-lana bultzatzea eta akuilatzea ere. Era berean, udalak gazteen arten lan egiteko lerro berri bat ireki nahi du horrela.
Beka honen zenbatekoa 8.000 eurokoa da eta esleipena jasoko duenak 8 hilabete izango ditu lana gauzatzeko, esleitzen den egunetik aurrera. Proiektuaren azken formatua era askotakoa izan daiteke: proiektua, prozesua edo ekintza, hala nola, dibulgaziozko materiala, lankidetza-proiektuak eta/edo parte-hartzaileak.
Departamenduak azaldu du gazteen parte-hartze zuzena eta aktiboa sustatzen duten proiektuak direla “bereziki interesgarriak” zaienak. Adierazi dute baloratu egingo dutela erabiliko metodologiaren originaltasuna eta berrikuntza, bai eta hausnarketarako prozesuak ea integratu dituzten ere “gazteek esperimentatzeko eta partekatuz ikasteko balio badute”.
Lana bakarka edota lantaldean egin daiteke, eta ikertzaileek unibertsitate gradua edo lizentziatura edo goi mailako heziketa zikloa bukatuta izan beharko dute. Proiektuak aurkezteko azken eguna urriaren 5a da. Informazio gehiagorako esteka honetara jo daiteke.
