Denboraldiko lehen garaipena, Bilboko uretan
Asteburu honetan fin aritu dira Hondarribia Arraun Elkarteko hiru ontziak.
Hondarribiako arraunlariak Bilboko banderarekin. Eusko Label eta EuskoTren Ligetan dabiltzan bi traineruek Bilbon izan zuten asteburuko lehen hitzordua. Bigarrena, Orion.
Larunbatean heldu zen 2022-2023 denboraldiko lehen garaipena. Erlojupeko estu eta gogor baten ondoren eskuratu zuen gizonezkoen A ontziak Bilboko XIV. bandera. Erlojupekoetan distantziak laburtu egiten dira eta bigarren sailkatuak, Zierbenak, ez zizkion gauzak batere erraz jarri Ama Guadalupekoari. Azken luzean Hondarribiarren Zierbenarekiko errenta sei segundotara igo bazen ere, azkenean, 00:02:52 segundora amaitu zuten. Lehenengo txandatik hirugarrenera (Hondarribia hirugarrenean aritu zen), eremuaren exijentzia-maila igotzen joan zen, haizeak gora eta mareak behera egin baitzuen. A ontziko arraunlariek egoera maisuki kudeatu eta banderarekin zein lidertzarekin itzuli ziren etxera.
Hurrengo egunean Orion lehiatu ziren arraunlariak. Bertan, bigarrenak izan ziren. Estropada osoan zehar Donostiarrarekin sekulako borroka izan ondoren, azken unean hiriburuko eskifaiari gailentzea lortu zuten. Garaipena Urdaibairentzat izan zen. Denboraldiko seigarren jardunaldiaren ondoren liderrak dira Hondarribiarrak 54 punturekin. Urdaibai bigarren da 52 punturekin eta Zierbena, hirugarren, 51 punturekin. Datorren astean Sestaon eta Castron arituko dira.
Igande arratsaldean harrera egin zieten arraunlariei. 
Emakumezkoak
Emakumezkoen ontziak laugarren izan ziren asteburuko bi jardunaldietan. Bigarren asteburuz segidan, zentesimek pisu handia izan zuten sailkapenean. Hondarribiaren (laugarren sailkatua), Tolosaldearen (bosgarren sailkatua) eta Hibaikaren (seigarren sailkatua) artean 76 ehunen izan ziren soilik. Aldi honetan, baina, zentesimak aldeko izan zituzten hondarribiarrek. Hala, hurrengo egunean ohorezko txandan parte hartzeko txartela eskuratu zuten. Bilboko bandera Arraun Lagunak-entzat izan zen. Donostiako bi ontziek zein oriotarrek eremuko errekorra hautsi zuten.
Igandean, ohorezko txandan irten ziren. Hasiera batean Orioren, Arraun Lagunak-en eta Donostiarraren aurka lehiatu behar ziren, baina, azkenean, Donostiarrak deskalifikatuak izan ziren. Arrazoia hurrengoa: patroiak lasta ontziratzea ahaztu zuen. Hondarribiarrak laugarren amaitu zuren jardunaldia, Tolosako ontzitik (hirugarren sailkatua) 16 segundotara. Datorren asteburuan ez dute jardunaldirik izango.
B ontzia
Gizonezkoen B ontziak estropada bakarra izan zuen asteburuan. Pedreñan izan ziren larunbatean. Lehenengo txandan irten eta, hura menderatu ondoren, zortzigarren sailkatu ziren. Datorren asteburuan ere jardunaldi bakarra izango dute larunbatean, Plentzian (Bizkaia), arratsaldeko 18:30ean.
