61 enpresek enpresa berritzailearen ziurtagiria jasoko dute
Ziurtagirien banaketa ekitaldia bihar izango da Urnietako Erratzu industrialdean kokatuta dagoen Iparlat enpresan, 09:30etik 10:00etara, eta Bidasoa Behereko, Donostialdeko eta Tolosaldeko 61 enpresek jasoko dute errekonozimendua.
Argazkia: Forest Pioneer. Hazinnova programari esker, euren berrikuntza proiektua “arrakastaz” ezarri duten Bidasoa Behereko, Donostialdeko eta Tolosaldeko 61 enpresek enpresa berritzailearen ziurtagiria jasoko dute Eusko Jaurlaritzako Ekonomia Garapen, Jasangarritasun eta Ingurumen sailaren, SPRIren eta Innobasque-Berrikuntzaren Euskal Agentziaren eskutik.
Ziurtagiri horren banaketa ekitaldia bihar izango da, hilak 4, Urnietako Erratzu industrialdean kokatuta dagoen Iparlat enpresan, 09:30etik 10:00etara. Ekitaldi horretan izango dira Aitor Urzelai SPRIko zuzendari nagusia eta Gotzon Bernaola Innobasque-Berrikuntzaren Euskal Agentziaren Enpresa Berrikuntzako koordinatzaile nagusia.
Ziurtagiriak banatu ondoren, berrikuntzako kasu praktikoen aurkezpena egingo dela jakinarazi dute antolatzaileek. Bertan, Hazinnova 2022 programan parte hartu zuten enpresetako hiruk, tartean Irungo Forest Pioneer, beren esperientzia praktikoak eta lortutako emaitzak partekatuko dituzte.
Bihar Urnietan egingo den ekitaldia Euskal Autonomia Erkidegoko (EAE) hainbat eskualdetan egiten ari diren bost ekitaldietako bat izango dela adierazi dute. Ekitaldi horietan, EAEko 321 ETEk berrikuntzaren euskal ekosisteman sartzeko egindako ahalegina aitortuko dela aurreratu dute antolatzaileek.
