Zortzi domina Euskadiko Atletismo Txapelketan
Bidasoa Atletiko Taldeko kirolariak maila bikainean daudela erakutsi zuten asteburuan Gasteizen. Urrezko hiru dominarekin, zilarrezko birekin eta brontzezko hirurekin itzuli dira etxera.
Argazkia: BAT. Euskadiko Atletismo Txapelketa absolutua lehiatu zen iragan asteburuan Gasteizen, eta gauzak ezin hobe atera zitzaizkien Bidasoa Atletiko Taldeko kirolariei, zortzi dominarekin itzuli baitira etxera: urrezko hiru, zilarrezko bi eta brontzezko hiru.
Klubak zehaztu du Euskadiko Txapelketa proba ona dela Espainiako Txapelketei ekiteko, asteburu honetan lehiatuko baitira 16 urtez azpikoen eta masterren Espainiako Txapelketak. BATeko atletak maila onean daudela ziurtatu du klubak.
Urrezko dominak hiru gizonek lortu zituzten: Ander Angladak 800 metrotako proban (01:51,85 minutu), Asier Zarandonak disko jaurtiketan (43,05 metro) eta Juan Errandoneak jauzi hirukoitzean (14,95 metro).
Goizane Garciak daraman denboraldi bikainari jarraipena eman zion Gasteizen. BATeko jaurtitzailea hiru dominarekin itzuli da etxera, maila handia erakutsiz. Disko jaurtiketan zilarrezko domina erdietsi zuen 40,16 metroko jaurtiketarekin. Mailuan eta pisuan, aldiz, brontzezko dominak lortu zituen, 43,40 metroko eta 11,42 metroko jaurtiketekin, hurrenez hurren.
Urte biribila daraman beste kirolari bat Laia Olaskoaga da, eta Euskadiko Txapelketa ez zen salbuespena izan, bi dominarekin itzuli baita etxera. 100 metrotan 12,25 segundoko denborarekin eskuratu zuen zilarrezko domina, eta 200 metrokoan, berriz, brontzezkoa 24,56 segundoko denborarekin.
Lortutako domina eta podiumez gain, klubak atleta guztien parte hartzea nabarmendu du. Hona hemen Euskadiko Txapelketaren emaitza guztiak.
Asteburuko agenda:
- 16 urtez azpiko Espainiako Txapelketa.
- Master mailako Espainiako Txapelketa.
- Teresa Errandonea Espainiako selekzioarekin arituko da Europako Txapelketan.
