Suaren inguruan, ohiko erritualak
San Joan bezperan, Hondarribiko Hiria Musika Bandaren kontzertua, Hondarribia Arraun Elkartearen eskifaien aurkezpena, San Joan Sua piztea eta Meakako Adixkideak Dantza Taldearen emanaldia antolatu dute.
Ostiral honetan San Joan bezpera ospatzeko urteroko ekitaldiak egingo dira Hondarribiko Benta Zaharrean.
Arratsaldeko 20:00etan emango diote hasiera arratseko ospakizunei Hondarribiko Hiria Musika Bandaren San Joan Zortzikoa kontzertuarekin.
Ondoren, 20:15ean 2023ko arraun denboraldian arituko diren arraunlarien aurkezpena egingo du Hondarribiko Arraun Elkarteak. Aurten ere, hiru talde aurkeztuko dituzte: Gizonezkoen A taldea, gizonezkoen B taldea eta Emakumezkoen taldea. Iaz egun txarra egin izanagatik Itsas Etxea Auditoriumera lekualdatu zuten ekitaldia. Aurkezpena amaitzerakoan San Joan Sua piztuko dute.
Lehen txinpartak piztearekin batera hasiko du Meakako Adixkideak Dantza Taldeak bere emanaldia. 20:45ak inguru izatea aurreikusi dute. Azkenik, urteko gau luzeena ospatzeko zezen suzkoa bentatik irtengo da.
