[Emaitzekin] Real Unionek maila mantendu du
Txuribeltzen talde nagusiak berebiziko partida zuen eta ez zuten huts egin. Irundarrak 2-0 nagusitu ziren Stadium Galen eta salbazio matematikoa lortu dute.
Argazkia: @photos_lasa. Asteburu biribila izan da lehian diharduten Irungo kirol taldeentzat. Real Unioneko talde nagusiak berebiziko partida zuen Stadium Galen maila mantentzeko lehian, eta txuribeltzek ez zuten huts egin. Galeko harmailak zalez beteta, irundarrak 2-0 nagusitu ziren aurkari zuzena zen La Nuciaren aurka, eta salbazio matematikoa lortu dute. Liga bukaera bikaina osatu ondoren, lortu dute maila mantentzeko helburua.
Real Unionen bigarren taldeari dagokionez, Gizonen Gorengo Mailako finala jokatu zuten larunbatean Martutenen, eta horiek ere ez zuten huts egin, 2-1 nagusitu baitziren Beasainen bigarren taldearen kontra. Denboraldi aparta osatu dute, eta beren taldeko txapeldun izan eta igoera lortu ondoren, euren mailako txapeldun izendatu dira. Gizonen Ohorezko Erregional mailan arituko dira 2023-2024 sasoian.
Eskubaloian Bidasoa Irunek garaipen garrantzitsua lortu zuen Huescan (31-39) eta Europako postuen lehian jarraitzen dute. Asobal Liga bukatzeko jardunaldi baten faltan, Europara sailkatzeko aukerekin iritsi dira Jacobo Cuetararen mutilak. Larunbatean itxiko dute denboraldia Artalekun, Puente Genilen aurka, 18:30ean.
Bidasoako jubenil gizonak ere zorioneko dira, Gipuzkoako Kopako txapeldun izan baitira. Aloña Mendi eta Tolosa garaitu ondoren, bere egin dute Gipuzkoako Kopa.
Gizonen Lehen Maila EEFF
- Real Union 2-0 La Nucia.
Gizonen Gorengo Maila Finala
- Real Union B 2-1 Beasain B.
Gizonen Lehen Erregionala Kopa Kanporaketak
- Intxurre 4-2 Dunboa Eguzki.
ESKUBALOIA
Asobal Liga
- Huesca 31-39 Bidasoa Irun.
Gipuzkoako Jubenil Kopa
- Lana Aloña Mendi 8-16 Bidasoa Irun.
- Bidasoa Irun 13-12 Tolosa Eskubaloia.
