Lorezainen greba "arrakastatsua" izan dela esan du ELAk
Elai Serbitzuak enpresako langileek hiru greba egun egin dituzte hilaren 21etik 23ra. Langileen %100ak egin du greba, "hitzarmen propioaren alde".
Elai Serbitzuak enpresako langileek hiru greba egun “arrakastatsu” egin dituztela jakinarazi du Oarso Bidasoko ELA sindikatuak. Langileen %100ak egin du greba, eta hilaren 21etik 23ra Hondarribiko Udaletxean lorezaintza zerbitzurik egon ez dela adierazi dute.
“Hitzarmen propioaren” aldeko aldarria egin dutela azaldu du sindikatuak, bai Hondarribian, baita enpresak Hernanin duen egoitzan ere. ELAk gaineratu du udaletxeari “exijitu” diotela “bere langileak zaindu” ditzan, langileak “hitzarmen propiorik gabe” dauzkatela eta horrek “enpresaren menpe” uzten dituela.
Horrez gain, enpresari “mezu argi bat” bidali diotela zehaztu du sindikatuak: “Hondarribiko lorezainek berezko hitzarmena nahi dute, trikimailurik gabe eta Hondarribiko lan baldintzak arautuko dituena”. Negoziaketarik egon ezean, “motozerra hotsak berriro kaleak astinduko dituela” argi utzi dute.
