Etorkizuneko hirien inguruan hausnartuko dute IDEIAlekun
Irungo EAJk Javier Martinez Callejo arkitekto hirigile aditua gonbidatu du Irunera ostiralean etorkizuneko hirien beharrei buruzko ikuspegi bat eskaintzera.
Ostiralean, hilak 10, 19:15ean, Javier Martinez Callejo arkitekto hirigile aditua eta Hirigintza Arkitektoen Elkarteen Batasuneko presidentea IDEIAlekun izango dela azaldu du Irungo EAJk, etorkizuneko hirien inguruan berban.
Jeltzaleek adierazi dute Martinez Callejok etorkizuneko hirien beharrei buruzko ikuspegi berri bat eskainiko duela hitzaldian, hiriek etorkizunean izan beharko luketena eta egun dauden joerak esplikatuz.
Era berean, “hiri moderno, eredugarri eta pertsonen beharretara egokitutako” hiri bat edukitzeko, egun “kontuan izan beharreko ildoak” ere azpimarratuko dituela eutsi dute: “Hiri batean planteatzen den hirigintzak, egungo kezka handiei erantzun behar die; hala nola, biztanleriaren zahartzeari, eraikitako eraikinen zaharkitzeari edo klima-aldaketaren erronkei. Baita mugikortasun berriak eskatzen dizkigun aldaketei ere”.
EAJk aurrera daramatzan jardueren barruan, astero IDEIAlekura aditu bat ekarriko dutela jakinarazi dute. Aditu horiek “irundarrak kezkatzen dituzten gaiei buruz” hizketan arituko direla aurreratu dute jeltzaleek: “Aurretiaz, kezka eta behar horiek herritarrekin beraiekin aztertzen joan gara, eta, horretarako, gure hiriaren, Irunen, egungo egoera hobetuko luketen proiektuak ditugu”.
EAJk interesa duen oro gonbidatu du ostiralean IDEIAlekura bertaratzera, Javier Callejoren hitzaldian parte hartzera eta hiriak nolakoak izan behar luketenaren inguruko ideiak partekatzera.
Jeltzaleek esan dute egunero lan egiten dutela “irundar guztien bizitza hobetzeko”, eta bide horretan, “ezinbestekotzat” jotzen dute “pertsonen iritzia” izatea.
