Pirritx, Porrotx eta Marimotots, igandean Amaia KZn
Pailazo ezagunak 35. urteurrenaren bira egiten ari dira, eta Irunen egingo dute geldialdia. Saio bikoitza eskainiko dute: 15:00etan eta 18:30ean.
Pirritx, Porrotx eta Marimotots pailazo ezagunak Irunen izango dira igande honetan. ‘Urteak bete, abenturak bizi!’ izena duen ikuskizuneko bi saio eskainiko dituzte Amaia Kultur Zentroan: 15:00etan eta 18:30ean.
Pailazoak 35. urteurrena betetzen ari dira, eta adierazi dutenez, “ospakizun giroan” datoz Irunera. Pailazo taldeak jai giroko bira handi bat antolatu dutela zehaztu dute milaka abentura bizi izana ospatzeko, eta “oso geldialdi berezia” egingo dute Irunen.
Igandean helduak zein gaztetxoak “emozioz eta dibertsioz” betetako ikuskizun batez gozatzeko bilduko direla nabarmendu dute: abestiak, dantzak eta taldearen urteurrena ospatzeko tarta erraldoi bat izango dira.
Ikuskizuna “barre egiteko berme seguru” bat izango dela adierazi dute. Sarreren prezioa bost eurokoa da, eta Amaia KZko txarteldegian edo webgunean eskura daitezke.
