Oroimen tailerrak egingo dituzte Bidasoko zahar etxeetan
Pertsona helduen memoria estimulatzeko xedearekin, bi tailer antolatu dira: bat, Irungo Anakan eta bestea, Hondarribiko Betharramen.
Real Unioneko Beteranoen Elkarteak eta Grupo Caser Residencial enpresak Futbolari Beteranoen Elkarteen Espainiako Federazioak sustatzen dituen ‘Oroimen tailerrak’ abiatuko dituzte urtean zehar Bidasoko zaharren egoitzetan. Bi ikastaro izango dira: lehena, Irungo Anakan, urtarriletik apirilera; eta, bestea, Hondarribiko Betharramen, irailetik abendura.
Tailer horietako saioak Real Unioneko jokalari ohiek gidatuko dituzte, eta horiez gain, talde txuribeltzean edo Bidasoko eskualdean erreferente izandako pertsonek ere hartuko dute parte egitasmoan. Proiektuaren antolatzaileak “pozik eta harro” dira abiatutako iniziatibarekin. Euskal Herri mailan, Real Uniongoa da tailer horiek sustatzen dituen hirugarren beteranoen elkartea, Athleticekin eta Realarekin batera.
Antolatzaileek azaldu dutenaren arabera, oroimenarena emaitza onuragarriak dituen terapia bat da. Pertsona helduengan memoria estimulatzean datza, kasu honetan futbolarekin zerikusia duten oroitzapenak azaleratuz. Euren intentsitatearengatik, oroitzapen horiek oso markatuak geratzen direla esan dute, eta zahartzaroaren patologia arrunten garapena atzeratzen laguntzen dutela gaineratu dute.
Datozen asteetan emango dute tailerren garapenaren berri.
