Olaberria eta Txenpereneko planak, argi berdea lortzear
Olaberria babesteko Plan Berezia otsaileko Osoko Bilkuran onartuko dute. Aldiz, Txenpereneakoaren behin behineko plana aztertuko dute.
Olaberriko eta Txenpereneko Plan Berezien aurrerapenari buruzko informazioa emateko zuzenketen kudeaketa bukatu duela jakinarazi du gaur Irungo Udalak. Hurrengo urratsa bihar izango den Aholku Kontseiluan alegazioak eta egindako txosten sektoriala aurkeztea izango da.
Olaberria auzorako Plan Berezi bat idazten ari da udala, harana babesteko helburuarekin. Eremu hori zaintzeko hartutako konpromisoagatik ekin zioten lan horri, eta plan hori herritarrengana gerturatzeko erakusketa bat ere jarri zuten Olaberrian.
Otsailean egingo den Osoko Bilkuran aurkeztu nahi dute behin betiko onartua izan dadin. Horregatik, bihar aurkeztuko diete udal ordezkari eta elkarte ezberdinei.
Txenpereneako Plan Bereziari dagokionez, behin behineko onarpena da aztertuko dutena. Ondoren, urtarrileko Osoko Bilkurara eramango dute aurre plana. Era berean, alegazioen eta txosten sektorialen berri emango dute ere.
Txenperenearako proposatzen duten hirigintza antolamendu berria “jasangarriagoa” dela dio udalak ingurumenari erreparatuz, “baita trinkoagoa eta erabilera mota gehiagokoa ere: bizitegiak, lantegiak, merkataritza…”. Horrez gain, Plaiaundiko kirol instalazioak bertara lekualdatuko dituzte udalbatza horretan.
Berdeguneak sortuko dituztela ere aurreratu dute, hala nola, Alai Txoko parkea, Egiluzeko zuhaitztia eta Berio kalea lotuko dituen parke lineal bat. Bestalde, kirol ekipamenduak, eskola ekipamenduak eta ekipamendu sozial berriak sortzeko aukera planteatu dute, “eremuari berari eta inguruari zerbitzu egiteko”.
