Normaltasunez egingo dira Erregeen postaria eta desfilea
Adin txikikoek dokumentu bat bete beharko dute postarian zein desfilean parte hartu nahi badute.
Errege magoak. Eguberrietako jaien azken txanpan sartu gara dagoeneko. Aste honetan Erregeen egunarekin emango diogu amaiera egun berezi hauei.
Aurten normaltasun osoz Erregeen postarian eta desfilean parte hartu ahal izango dute herritarrek. Era berean, adin txikikoek (16 urte azpikoek) ere parte hartu ahal izango dute, baina horretarako dokumentu bat bete beharko dute. Dokumentu hori BAZen edo Arma Plazan jaso ahal izango da. Postaz bidaltzeko eskatu ezkero orriak etxean jasotzeko aukera egongo da ere.
Inprimakia urtarrilaren 4an, 16:30ean luzatu beharko da Jostaldi Pilotalekuan. Mozorroak hurrenkeraren arabera esleituko dituzte, agortu arte. Urtarrilaren 5ean Erregeen desfilerako mozorroekin zein inskripzioekin berdin jokatuko dute. Egun honetan 16:00etan hurbildu beharko dira Jostaldira.
Egun handiak
Urtarrilaren 4ean Erregeentzako kartak jasoko ditu karteroak.
Urtarrilaren 5ean desfilea gauzatuko da. Itsasontziz 19:15-19:30 inguru helduko dira Kai Zaharrera. Bertan, zaldietan igo eta ohiko ibilbidea egingo dute San Pedro kalean barrena.
