Agur Kopari
Real Union Espainiako Kopako ametsetik esnatu zen bart. Partida bikaina jokatu arren, 0-1 galdu zuten Mallorcaren aurka eta txapelketatik at geratu dira.
Argazkia: @photos_lasa. Ibilbide bikaina osatu arren, Real Unionek agur esan dio Espainiako Kopari. Esnatu dira, hortaz, murgilduta zeuden amets gozotik. Lehen kanporaketan Cadiz garaitu bazuten ere, atzo ezin izan zuten Lehen Mailako Mallorca menperatu (0-1), eta sailkapenak ihes egin zuen Stadium Galetik.
Txuribeltzak, baina, kanporaketan sartuak egon ziren une oro, eta harrotasunez agurtu daitezke txapelketatik. Mallorcak, hamaikako titularrarekin, garaipena lortzeko sufritu behar izan zuen, baina lehen zatiko 20. minutuan Dani Rodriguezek eskuratutako gola nahikoa izan zen sailkapena lortzeko. Irundarrek borrokatu bazuten ere, markagailua ez zen mugitu, eta Mallorca izango da Espainiako Kopako final hamaseirenetan egongo den taldea.
Koparen ametsa atzean utzita, ligan zentratu beharko dira irundarrak buru-belarri. Orain, Eguberriak direla eta, bi asteko etenaldia izango du txapelketak, eta 2023ko urtarrilaren 8an itzuliko dira lehiara Castellon.
