Langabeek euskara doan ikasi ahal izango dute
Udal Euskaltegiak martxan du Lannahi programaren bigarren txanda. Izen-emateak azaroaren 28tik abenduaren 9ra egin behar dira.
Argazkia: Irungo Udala. Irungo Udal Euskaltegiak martxan jarriko du Lannahi programaren bigarren txanda. Egitasmo hori langabezian dauden pertsonei zuzendua dago, haren bitartez euskara debalde ikasteko. Bigarren txandako ikastaroa 2023ko urtarrilaren 9tik apirilaren 4ra izango da, baina izen-emateak azaroaren 28tik abenduaren 9ra egin behar dira.
Irungo Udalak Lannahi programaren bost txanda eskainiko ditu guztira 2022-2023 ikasturtean, hiru ikasturtean zehar, eta beste biak, udan. Ikasturteko hautua egiten dutenek, goizeko txandan lau orduz ariko dira euskara ikasten, eta arratsaldeko txandan, berriz, hiru orduz. Udan, aldiz, lau ordu ariko dira goizez.
Programan izena eman nahi dutenek internet bidez egin ahal izango dute SAC24h webgunean edo HAZeko autozerbitzu terminalak erabiliz. Horretarako, Irun Txartela edo NA elektronikoa eta Izenpe bezalako ziurtagiri elektronikoak erabili beharko dituzte. Horrez gain, aurrez aurre ere eman daiteke izena Irungo Udal Euskaltegian.
Udal Euskaltegian ari direnen edo aurreko ikastaroan aritu direnen kasuan izan ezik, gainontzekoek mailaketa proba bat egin beharko dute. Proba hori egiteko beharrezkoa da hitzordua eskatzea 943 50 52 73 telefonoan.
Ikastaroa doakoa izateko honako baldintzak bete behar dira:
- Lanbiden lan eskatzaile bezala inskribatua egotea.
- Langabezian egotea, %50 edo gehiagoko ABEEn (aldi baterako enplegu-erregulazioko espedientea) egotea, edo lanean egonda ere, lanaldiak jardun osoaren %50 ez gainditzea.
Baldintza horiek betetzen ez dituzten pertsonek matrikula ordaindu beharko dutela zehaztu dute. Dena den, ordaindutako kopurua udalak urtero ateratzen duen beka deialdiaren bidez berreskuratzeko aukera izango dute.
Bestalde, urritik ekainera bitarteko ikastaroetan aritzeko tokia dago, eta hiritarrak matrikulatu daitezke. Informazio gehiagorako interesdunek 943 50 52 73 telefonora deitu edo Irungo Udaleko webgunera jo beharko dute.
