Hirugarren kiroldegi bat proposatu dute jeltzaleek
Kirol instalakuntzen gabezia azaleratu duen txostena oinarri, San Migelen kiroldegi berritzaile bat egin nahi dute.
Kiroldegi bat San Migelen eraikitzearen proposamena egin du gaur EAJk. Berritzailea litzatekeela diote, kontzeptu berriak elkartuko lituzkeelako: “Teknologia eta kirola, osasuna eta kirola”. Julian Sanchez parkearen aurrean egitea da asmoa.
Ideia hau garatzeko udalak egindako kirol ekipamenduen ikerketaren emaitzetan oinarritu dira. Kopuruarekiko ratioak handiak direla esaten du txostenak eta instalazioen eskaintza ez dela nahikoa. Bereziki, hiriaren hegoalde eta mendebaldean nabarmendu dute gabezia.
Auzoaren elementu integratzailea izatea nahi dute, eta era berean, kirol instalakuntza berri batekin kirolarien kopurua handituko litzatekeela aurreikusi dute jeltzaleek.
Anaka eta San Migelen 14.000 bizilagun baino gehiago bizi dira egun, Irunen biztanleriaren %22. Aurreikusi dute, gainera, biztanleria %26ra igoko dela, han 1.200 etxebizitza eraiki nahi dituztelako.
Udal kirol politikez ere mintzatu da alderdi jeltzalea eta Irunen goi mailako kirolariak badaude ere, kirol politikak kirola egunero egiten dutenak aintzat hartu behar dituela uste dute. “Beren egunerokotasunean kirola egiten duten pertsona horiek guztiek ere onena merezi dute, instalazio egoki, osatu, berritzaile eta modernoez gozatu ahal izateko aukera”.
