Irungo saioko hasierako agurrak
Ane Labaka Maioz
Alarde egin nahi dugu libre
irrintzi eta deiadar
beti bultzaka dauzkagulako
horrenbeste gorputz adar
gaur inor ez da saioko neska
egin dezala plazak gainezka
berez zulo bere labar
pozik nengoke oholtza honetan
ezer ez balitz estandar
baizik eztanda sortu ditzagun
mila argi izpi ñabar
saia gaitez hitzak etzaten
mihiek dantza egin dezaten
ta ahal bada bide nabar oinek
dir-dir soinek dar-dar.
Jone Uria Albizuri
Irun badaukazu zerbait
doinu hau bere xumean
mugarri diren saioak
non eta muga gunean
muga ireki zenuten
antza lehengo egunean
nahiz polizia berriro
hasiko zen jardunean
Irundik Iruñea ez da
gera hain urrunean
muga letra eta erdi
baten isiltasunean
guk hemen egon nahi dugu
mugan gertutasunean
zeharkatzen saiatzeko
irekitzen den unean.
Nerea Ibarzabal Salegi
Mugen kontrako mugako herri
korronte guztien pista
gure begiak daude Irunez
eta begirunez dizdizka
kaixo Ficoba poxpolo kaxa
erraldoi gris ta gorrixka
gaurko guztion kolektibo bat bizi nahi dugu berriz ta
hurbil zaitezte hasi dardarka elkarren kontra irrista
zerbait pizteko gogoak berak
sortzen baitu lehen txispa.
Sustrai Colina Acordarrementeria
Gogoan dut bost edo
sei urte neuzkala
Ficoban polizien gari ta zetzala
ta autoa etxolara
gerturatu ahala isiltzen ginela
ta giratu diala
gaur isiltzen zen haurrak
kantatu dezala.
Maddalen Arzallus Antia
Txapelketa prestatu didate neurrira
lehenengo topoz joan nintzen Donostira
etxerako bidean Ficobara gira
ta hemendik nere etxera berrehun metro dira
google mapsa bidea markatzen ari da.
Miren Artetxe Sarasola
Bizitzaren erruleta
beti jira eta buelta
baina bat batean epa
iristen da txapelketa
ta bizitzaren zentzu hau zenda
burmuina atzean gordeta
dena bihurtzen da
doinu rima puntu eta prestaketa
edukitzeko burua
argi eta azala alerta
ba hemen gaude seiko motza prest
eta Ficoba beteta
hasi dedila erokeri hau
desiatzen gaude eta.
