[Argazki galeria] Urduritasunez eta txaloz betetako finalaurrekoa
2.500 bertsozale elkartu dira Euskal Herriko Bertsolari Txapelketa Nagusiko finalaurrekoetako Irungo saioan. Sei bertsolari eta horietatik hiru bidasoar igo dira oholtzara.
Maddalen Arzallus eta Miren Artetxe, bien lehen ariketan. Irunen izaten ari da Euskal Herirko Bertsolari Txapelketa Nagusiaren finalaurretakoetako lehen itzuliko hirugarren saioa, Ficoban. 17:00etan hasi da eta zozketaren arabera, hurrenkera honetan esleitu zaie jarduna gaurko bertsolariei: Ane Labaka Maioz, Jone Uria Albizuri, Nerea Ibarzabal Salegi, Sustrai Colina Acordarrementeria, Maddalen Arzallus Antia eta Miren Artetxe Sarasola. Azken hiruak, bidasoarrak.
Guztira 2.500 pertsona bildu dira gaurko saioan eta erabakigarrietako bat izango da. Fase honetan hogei eta lau bertsolari dabiltza eta hemezortzik lortuko dute bigarren itzulirako txartela. Ondoren, beste hiru saio egingo dira eta finalean nor arituko diren jakingo da, dagoeneko sailkatua dagoen Maialen Lujanbiorekin batera.
Gaur Bidasoa ordezkatzen ari diren bertsolariek badute esperientzia txapelketa nagusian; Arzallusen hirugarren aldia da, Artetxerena laugarrena eta Colinak sei txapelketa nagusi daramatza. Azken honek, bestalde, Xilabako txapela jantzi du bitan, 2014 eta 2016ean; Arzallus, bigarren izan zen 2014ko Xilaban; Era berean, Artetxe txapeldunordea izan zen iazko Xilaban, eta egun, Euskal Herriko Bertsozale Elkarteko lehendakaritza taldeko kidea da.
Lehenik, ohi moduan, hasierako agurra egin dute bertsolariek. Lotura honetan jaso ditu HITZAk. Jarraian, bigarren ariketa egitera atera dira Arzallus eta Artetxe. Irun eta Hendaia arteko zubian kokatu dituzte non gazte batek ea haien autoan beste aldera pasa ahal dien galdegin dien. Hasieratik presente izan da mugaren afera, bai agurretan bai gaietan.
Saioaren kronika zehatza eta puntuaketak ikusteko, joan hona:
