Kultura ekosistema aztertu nahi du udalak
Formulario bat jarri dute eskura artisten datuak biltzeko eta saretze bat martxan jartzeko.
Kultura eta sorkuntza ekosistemaren mapa egin nahi du Irungo Udalak eta horretarako prozesu bat abiatu du. Lehen urratsa formulario bat betetzea litzateke, udalaren orrialdea eskura daitekeena. Bidasoan dabiltzan artistei zuzendutakoa da, ez espresuki irundarrentzat.
Ekosistema horren helburuetako bat interes komunak dituzten sortzaileen arteko harremana erraztea da. Era horretan proiektuak garatzeko bide bat sortu nahi dute. Beraz, lehen fase honetak artisten datuak biltzeko eta eskuragarri jartzeko balioko dute.
Programa honen abiapuntua zein den jakiteko Belarte artisten eskaerari begiratu behar zaio. 2022ko abenduaren 20an mozio bat erregistratu zuten udalean, Kultura KM0 programa hedatzea eskatuz.
Izan ere, taldearen ustez “Izaera apartidista eta erakunde publikoetan egiten den kulturan eta kudeaketan soilik interesatua” da programa, Noticias de Gipuzkoan jaso zutenez.
