'Munduari bira', haurtxokoen lehen proposamena
Lau bloketan banatu dituzte, bakoitza hiriko haurtxoko batean. 4-8 urte arteko haurrentzat dira, izen-emateak irekita daude eta larunbat honetan hasiko dira Txikilaben.
Hiriko lau haurtxokoetan ikasturtea hastearekin batera, Irungo Udaleko Gazteria sailak udal instalazio guztietan banatuta emango diren doako tailerren lehen multzoaren berri eman du, lau eta zortzi urte arteko haurrei eskaintzen zaizkienak. ‘Munduari bira’ izenburua duen jardueran hainbat balio landuko dira, hala nola, kultur aniztasuna, elkar ezagutzea eta errespetua. Izen-emateak irekita daude jada, eta asteazkenean, hilak 19, itxiko dira. Izen-emate horiek Irungo Udaleko webgunean egin behar dira, eta plaza mugatuak daude.
Udaletik zehaztu dute, migrazioari, globalizazioari eta merkataritza digitalari esker urruneko geografia eta kulturetako gizabanakoekin harremanetan jartzea oso erraza den mundu batean bizi garela. Hori dela eta, txikitatik kulturartekotasuna lantzea oso garrantzitsua dela uste dute, eta balio hori antzeko beste batzuekin harremanetan dagoela eutsi dute: kultur aniztasunarekin, elkar ezagutzarekin eta errespetuarekin.
‘Munduari bira’ egitasmoa lau bloketan garatuko da, gai eta teknika ezberdinekin, eta bakoitzak bost saio izango ditu. Ikastaro horiek larunbatetan egingo dira, 11:00etatik 13:00era, eta bloke bakoitzak saio bat izango du 09:00etatik 13:00era. Bloke bakoitzak aukera emango du saioak haurtxoko ezberdinetan garatzeko, eta jardueren ikuspegia parte hartzaileen adinetara eta haurtxoko bakoitzaren ezaugarrietara eta ingurunera egokitua dago.
Lehen blokea larunbat honetan hasiko da, hilak 22, Txikilabeko Haurtxokoan. Lehen bloke horretako beste saioak azaroaren 5ean, 12an eta 26an eta abenduaren 3an izango dira.
Lehen blokea: Urria-abendua
- Gaia: Amerika.
- Tokia: Txikilabeko Haurtxokoa.
Bigarren blokea: Urtarrila-otsaila
- Gaia: Afrika.
- Tokia: Landetxa Haurtxokoa.
Hirugarren blokea: Otsaila-martxoa
- Gaia: Asia.
- Tokia: Lapitzeko Haurtxokoa.
Laugarren blokea: Maiatza-ekaina
- Gaia: Ozeania.
- Tokia: San Migeleko Haurtxokoa.
