Zaisa Txingudi, etxeko lehen garaipenaren bila
Iragan larunbatean sasoiko lehen garaipena lortu ondoren, etxeko lehena bilatuko dute larunbatean Arratiko Zekorren aurka.
Bera Bera B-ren aurkako partida. Iragan larunbatean denboraldiko lehen garaipena lortu ondoren, Zaisa Txingudik etxeko lehen garaipena lortu nahi du. Horretarako, Plaiaundira datorren hurrengo taldea menderatu beharko du: Igorreko Arratiko Zekorrak. Partida hori larunbatean jokatuko da, 16:30ean. Bidasoarrak konfiantza osoz iritsiko dira lehiara nagusitasunez lortutako azken garaipenaren ondoren, eta urrats berri bat ematen saiatuko dira Euskadiko Lehen Mailara itzultzeko bidean. Aukera ezin hobea dute larunbatean helburu horri forma ematen hasteko.
Iñigo Camarerok jokalari guztiak erabili ahal izango ditu, Aitor Azurmendi izan ezik, lesionatua baitago. Arratiko Zekorrak sailkapeneko azken postuan dira, eta ez dute puntu bakar bat ere lortu jokatu diren lehen bi jardunaldietan. Txingudi, berriz, laugarren da, sei punturekin.
Aurkaria azken postuan badago ere, Camarerok argi dauka Bidasoarrak ezin direla “fidatu”: “Arratiko Zekorrak oso aurkari kementsua da, eta egoera alde badu, min handia egin dezakeen taldea da”. Adibide gisa, bi taldeek jokatu zuten azken partidan, Bizkaitarrak nabarmen nagusitu ziren, 46-12.
Klubeko maila guztiak, martxan
Gizonezkoen lehen taldeaz gain, klubeko maila guztietako taldeek euren partidak jokatuko dituzte asteburuan. 18 urtez azpiko jokalariek Gernikan jokatuko dute larunbatean, 12:30ean. 16 urtez azpikoak ere larunbatean irtengo dira berdegunera. Euren arerioa Eibar izango da, 11:00etan.
Errugbi eskolako parte hartzaileek ere topaketa izango dute Hernanin igandean, 10:30ean. Txingudiko errugbi eskola 10 eta 12 urtez azpiko gazteek osatzen dute, eta Hernani, Atletico San Sebatian, Bera Bera, Zarautz eta Lasarteko Beltzak taldeen aurka egingo dute sasoiko bigarren topaketa.
Bestalde, Bidasoan errugbiari lotutako beste zenbait jarduera egongo dira asteburuan. Larunbatean, Hondarribian, 13 eta 14 urtez azpiko Gipuzkoako selekzioak kontzentrazioa egingo du 11:00etan. Horrez gain, igandean, Plaiaundin, Gipuzkoako neska errugbilarien entrenamendua egingo da, 11:00etan.
