Zaisa Txingudik larunbatean hasiko du sasoia
Bidasotarrak denboraldiko lehen garaipenaren bila aterako dira. Iruña taldea jasoko dute Plaiaundin, larunbatean, 16:30ean.
Aurreko denboraldiko partida La Unicaren aurka. Denboraldi aurrea pasata, larunbatean hasiko du Ohorezko B Mailako Euskal liga Zaisa Txingudik. Iñigo Camareroren mutilek Plaiaundin hasiko dute 2022-2023 denboraldia Iruña taldearen kontra, larunbatean, 16:30ean. Xabi Sanchez jokalariak adierazi duen moduan, bidasotarrak “sasoi betean” iritsi dira liga hasierara abuztuaren 1ean hasitako denboraldi aurrea pasata eta Hernaniko 23 urtez azpiko eta Atletico San Sebastian taldeen aurkako lehietan bi berdinketa lortu ondoren.
Zortzi taldek osatzen dute Ohorezko B Mailako Euskal liga, berritzailea den formatu batean. Ligaren lehen fasea itzuli bakarrera jokatuko da, eta talde bakoitzak zazpi partida jokatuko ditu. Lehen fase hori bukatutakoan, lehen postua eskuratzen duen taldeak bigarren fase bat jokatuko du Ohorezko A Mailako Euskal ligako azken bost sailkatuen aurka. Ohorezko B Mailako gainontzeko taldeak elkarren kontra lehiatuko dira bi itzulira. Bidasotarrak ziur dira dituzten aukerez, eta Sanchez argi mintzo da Zaisa Txingudiren lehen faseko helburuez: “Gure helburua, zalantzarik gabe, hasieratik lehen postuan kokatzea da”.
Helburu hori lortzeko, Camarero entrenatzaileak talde osoa izango du prest lehiari ekiteko. Aurkaria, Iruña, mailaz igotzeko faboritoetako bat da, eta iaz hirugarren postuan bukatu zuten liga Baztan Menditarrak eta Zornotzako Urgozo taldeen atzetik.
Errugbi eskolen topaketa, Hondarribian
Igandean, Zaisa Txingudiko 10 eta 12 urtez azpiko taldeek denboraldia hasiko dute Hondarribiko hondartzan egingo den Gipuzkoako errugbi eskolen arteko topaketan. Etxekoez gain, Hernani, Atletico San Sebastian, Bera Bera, Ordizia, Zarautz, Lasarteko Beltzak, Eibar, Arrasate, Mutriku, Gaztedi Rioja eta Iruña taldeak ariko dira. Lehen jardunaldia 10:30etik 13:00era izango da.
Azkenik, 16 urtez azpiko eta 18 urtez azpiko taldeei dagokionez, ez dituzte ligak asteburu honetan hasiko, bi lehiaketetako egutegiak egokitu baitituzte.
