Zaisa Txingudik taldeen aurkezpena egingo du larunbatean
20:00etan hasiko den ekitaldia Irungo kale nagusian izango da, eta klubeko talde guztiak aurkeztuko dituzte banan-banan.
Txingudi eta Bera Bera B-ren arteko aurreko denboraldiko partida. Larunbatean, hilak 24, Zaisa Txingudi errugbi taldeak 2022-2023 denboraldiko aurkezpen ofiziala egingo du Irungo kale nagusian, 20:00etan hasiko den ekitaldian. Zuzendaritzak hitz batzuk esan ondoren, taldeak banan-banan agertuko dira kale nagusian, emakumezkoen senior talde sustatzailetik hasita. Emakumeen ondoren, gainerako taldeak irtengo dira, honako hurrenkeran: Touch taldea, errugbi eskola, 14 urtez azpikoak, 16 urtez azpikoak, 18 urtez azpikoak eta, azkenik, gizonezkoen senior taldea.
Aurkezpena DJ Asuncioren musika saioarekin itxiko da, eta klubeko tabernaren kanpoaldean, Kale Nagusiko 11. zenbakian, karpa bat jarriko dute kideek merchandisinga saltzeko.
Senior gizonak, maila onean
Iñigo Camareroren senior mutilek maila ona erakutsi zuten denboraldi aurreko lehen norgehiagoketan. Bidasoarrek hiruko bat jokatu zuten Atletico San Sebastian eta Hernaniko 23 urtez azpiko taldeen aurka larunbatean Plaiaundin lehiatu ziren partidetan, eta bi berdinketa lortu zituzten, maila onean aritu ondoren.
