Veronica Urkiola Lekuonak bere izeneko plaza izango du
Larunbatean izendatuko dute Emeki Elkartearen ekimenez martxan jarri zen proiektuaren azken plaza.
Emeki elkarteko ordezkariak, Gotzone Larrarte zinegotzia eta Kote Gevara laguntzailea. Gaur goizean Mendelu auzoan izan dira Emeki elkarteko ordezkariak, Kote Gevararekin eta Gotzone Larrarte berdintasun zinegotziarekin. Larunbatean izendatuko dute Emeki Elkartearen ekimenez martxan jarri zen proiektuaren azken plaza. Proposamenak Hondarribiko zazpi plaza zehatzetan, emakumeak ardatz zituzten plazen izendapenak egitea jasotzen zuen.
Dagoeneko sei izendatu dituzte eta larunbatean izendatuko dute azkena. Lau izen propioak izan dira: Agustina Genua Saralegi, Petra Laborda Zazuarregi, Bienvenida Emazabel Susperregi eta Anttoni Etxeberria Mendizabal. Bi aldiz, orokorrak izan dira: Martxoak 8 plaza eta Saregileen plaza.
Gotzone Larrartek azaldu duenez egitasmoak Hondarribiko zazpi emakumeri “merezitako omenaldia” egiteko balio izan du, bai eta “herriarengatik egindako lana aitortzeko eta eskertzeko ere”. Tzane Carrillok Emeki Elkarteko kideak orain arte elkar lanean aritu diren elkarte guztiekiko elkarlana nabarmendu nahi izan du. Kote Guevara aldiz, oso hunkituta agertu da gaur egin duten aurkezpenean: “oso emakume umila eta langilea zen, bizitza osoan etenik gabe lan egin zuen, baita familia aurrera atera ere, eta gure ustez emakume eredu oso egokia da”.
Veronica Urkiola Lekuona plaza
Larunbatean eguerdiko 12:00etan Mendelu auzoan egingo dute Veronica Urkiola Lekuona plazaren inaugurazio ofiziala. Urkiolak auzoarekiko eta auzokideekiko lotura estua zuen, bertan ezarri baitzuen okindegia. Aurkezpenaren aurretik, 11:00etan, Kote Guevarak bisita gidatu txiki bat eskainiko du auzoan zehar. Inaugurazioaren ondoren Guevarak prestatutako argazki esposizioa ikusi ahal izango da.
