Marrazki eta Pintura Akademian matrikulatzeko epea, zabalik
Aurten telematikoki eman beharko da izena, estreinakoz. Urtean zehar bestelako jarduerak ere antolatuko ditu Akademiak.
Abian da 2022-2023 ikasturtean Udal Marrazki eta Pintura Akademian matrikulatzeko garaia. Akademiaren helburu nagusiak jendea arte plastikoekin harremanetan jartzea, eta ikasteko, sormena garatzeko eta partekatzeko topagune bat sortzea dira. Berritasun moduan, ikasturte honetatik aurrera izen-emateak telematikoki egin beharko dira, udalaren egoitza elektronikoaren bitartez. Horretarako, interesdunek ziurtagiri elektroniko bat erabili beharko dute identifikatzeko. Kontsultaren bat izanez gero, irailaren 22ra arte Akademiara gerturatu ahal izango da, 17:30etik 20:00etara. Honako helbide honetara idatzita edo 695 75 29 94 edo 606 22 04 17 telefono zenbakietara deituta ere argituko dira zalantzak.
Honakoak dira aurten eskainitako ikastaroak eta ordutegiak:
- Gazte eta helduentzako ikastaroak: asteazken, ostegun eta larunbatetan 10:00etatik 12:00etara; eta astelehen astearte eta asteazkenetan 16:30etik 20:30era.
- 6 eta 12 urte bitarteko haurrentzat: larunbatetan 10:00etatik 12:00etara, eta astelehen eta asteazkenetan 17:00etatik 19:00etara.
Ikastaroak astean bi edo lau ordukoak izan daitezke, eta matrikularen barne dago ikastaroa egiteko oinarrizko materiala.
Horrez gain, urte osoan bestelako jarduerak ere eskainiko dira, material birziklatua erabiliz euskarriak prestatzeko tailerra eta artista gonbidatuen masterclass eta tailerrak, besteak beste.
