Larreundiko bizilagunek elkarretaratzea egingo dute E25 autobus zerbitzua eskatzeko
Santa Elena karrikako lanak direla eta, linearik gabe geratu dira auzoan, eta eskutitza igorri diete udalari nahiz Gipuzkoako Foru Aldundiari.
Santa Elena karrikako lanak. Aste honetan hasi dira Santa Elena karrikako lanak, eta horrek ondorioak utzi ditu trafikoan. Hala nola, E25 autobus geltokia kendu dute lanek iraun bitartean. Larreaundiko bizilagunek ez dute begi onez hartu erabaki hori, eta auzo elkarteak jakinarazi duenez, hainbat kexa jaso dituzte azken egunetan.
Horren aurrean, batetik, elkarretaratzeko deia egin dute: astelehenean bilduko dira, 13:15ean, farmaziaren ondoan. Bestalde, konponbide bat emateko eskatuz eskutitza bidali diete Irungo Udalari nahiz Gipuzkoako Foru Aldundiari. Bertan, auzoan berriro autobus zerbitzua jartzea eskatzen dute lehenbailehen, edo, ezinezkoa balitz autobus erabiltzaileentzako eraginkorrak eta erosoak izango diren alternatibak bilatzea, pertsona zaurgarrienak kontuan hartuta.
Izan ere, linea horren erabiltzaile nagusiak adineko pertsonak eta mugikortasun arazoak dituztenak direla gogorarazi du auzo elkarteak.
