Adinekoen bakardadea prebenitzeko Hariak programa aurkeztu dute
Irungo adinekoentzako baliabideak ezinbestekotzat jo ditu alkateak gogoz kontrako bakardadeari aurre egiteko. Irunen zortzi daudela gogorarazi du.
![](https://bidasoa.hitza.eus/site/files/2022/06/hariak.jpg)
Atzo, Hariak, gogoz kontrako bakardadeari aurre egiteko eta herritarrek arazo horren konponbidearen alde kontzientziatzeko iniziatibaren aurkezpena egin zuten aldundiko Gizarte Politiketako diputatu Maite Peñak, eta Irungo alkate Jose Antonio Santanok.
Adinekoen ondoan egotea eta laguntzea “erronka” gisa planteatu du alkateak, eta pandemia egoerak hori ez duela errazten du iritzi. “Oso garrantzitsua da hirian ditugun adinekoentzako zentroen sarea, adinekoei laguntza ematen baitiete, eta bakarrik senti ez daitezen balio baitute”.
Udal programa horren bitartez isolamendu soziala, narriadura kognitiboa edo bazterketa sozialeko bestelako egoerak antzematen saiatuko dira. “Irungo udalerrian bakarrik bizi diren 75 urtetik gorako pertsonen artean, eskura dituzten baliabideen berri emateko edo Gizarte Zerbitzuei esku hartzeko abisua emateko”. Ildo horretan, zenbait tailer eskainiko dituzte estimulazio kognitiboa eta gaitasunak sustatzea xede. Zahartze aktiboa bultzatu nahi dute era horretan, bakardadea eta narriadura prebenituz.
2021. urtean udala 75 urtetik gorako 300 pertsonarekin jarri zen harremanetan; horietatik %70,33 emakumeak ziren, %29,67 gizonak. Horrez gain, zenbait tailer egin ziren adinekoentzako espazioetan, eski artean dituzten gaiak jorratzeko. Santanoren hitzetan, hirian azken hamarkada pasatxoan osatu den adinekoentzako zentroen sare horrek erakutsi du oso tresna erabilgarria dela isolamendua prebenitzeko eta jende askoren bizi-kalitatea hobetzeko. Guztira adinekoentzako erreferentziako zortzi puntu daudela hiri osoan banatuta gogorarazi du udalak.