Irungo Harrera Sareak bat egin du harrera duina aldarrikatzeko ekitaldiekin
Bertan bizi diren eta bidean doazen pertsona guztien oinarrizko eskubideak bermatzeko eskatuko dute kalean lo eginez, Euskal Herriko zazpi herritan.
![](https://bidasoa.hitza.eus/site/files/2022/06/kalean-lo.jpg)
Bihar gauean kalean lo egin dute migratzaile eta arrazakeria jasaten duten pertsonen oinarrizko eskubideen alde. Pertsona horiekin lanean ari diren hainbat erakundek antolatu dute iniziatiba, eta horien artean, Irungo Harrera Sarea dago. Hain zuzen, elkarretaratzea egingo dute bihar, San Juan plazan, 19:30etik aurrera. Herritar guztiak animatu dituzte parte hartzera, diskriminazioaren kontra eta harrera duin baten alde.
Irunez gain, Euskal Herriko zazpi hiritan egingo dute ekintza Bilbo, Donostia, Gasteiz,
Iruñea, eta Arte-Igorre. Horren helburua Eusko Jaurlaritzari eta Nafarroako Gobernuari bertan bizi diren eta bidean doazen pertsona guztien oinarrizko eskubideak bermatzea izango da: “Premiazkoa da baliabide eta aurrekontu egokiak eskaintzea”. Era berean, Atzerritarren Legedia salatu dute, “erakundeen arrazakeriaren isla” iritzita. “Horren ondorioz, milaka pertsonek ezin dute garatu euren bizi-proiektua eta irregulartasunean bizitzera zigortzen ditu”, gaineratu dute.
EAE nahiz Nafarroako gobernuek harrera planak onartu badituzte ere, praktikan ez dituztela betetzen adierazi dute eragileek, eta, ondorioz, 500 lagunek egiten dutela lo kalean, “ez dute etxebizitzarik lortzeko biderik eta zailtasunak dituzte erroldatzeko”. Horrez gain, poliziaren jazarpena jasaten dutela gaitzetsi dute, eta identifikazio arrazistak egiten dizkietela, kanporatuak izatera bideratuz.
Pertsona guztien eskubideak “berdin” errespetatu behar diren arren, Atzerritartasunaren Legeak pretsona batzuen eskubideak murrizten dituela zehaztu dute, eta lana lortzeko zailtasunak nahiz euren egoera egonkortzeko trabak izaten dituztela: “Pertsona guztien erregularizazioa
eskatzen dugu eta herritar guztien babesa, gure herria benetako harrera herria izan dadin”.
Lo egiteaz gain, bestelako ekimenak egiteko prest azaldu dira eragileak. Honakoak dira: Irungo Harrera Sarea, Atxuri Harrera, SOS Arrazakeria, Mbolo Moye Dole elkarte senegaldarra, Ecuador Etxea, Ongi Etorri Errefuxiatuak, Bilbo Zaharra, San Frantzisko eta Zabala taldeen koordinadorak.