Asteburu honetan Hondarribia Erdi Arora itzuliko da
Hilaren 11n eta 12an Erdi Aroko Azoka bueltan izango da. Artisauen 80 postu egongo dira alde zaharreko sei guneetan banaturik.
Maria Serrano udal ordezkaria Erdi Aroko azokaren aurkezpenean. Asteburu honetan Hondarribia Erdi Arora itzuliko da Erdi Aroko Azokarekin. Bi urte igaro dira azken azoka egin zenetik eta beraz “artisauak gogotsu daudela” adierazi du Maria Serranok, Sustapen Ekonomikorako zinegotziak. Gainera, Erdi Aroko Azoka “berreskuratzea” berri ona dela nabarmendu nahi izan du, “azken urtean artisau azokak asko jaitsi dira eta aukera ona izango da beren produktuak berriro ere erakusteko eta saltzeko”.
Gipuzkoa plaza, Denda kalea, Arma Plaza, Bretxa, Apezpiku plaza eta Kasino Zaharraren inguruan ezarriko dituzte aurten bertaratuko diren arotzen, errementarien, upelgileen, urreginen, harginen eta artisauen 80 postuak. “Zeramika, bitxiak, xaboiak, elikagaiak eta artisau eran egindako beste zenbait produktu aurkituko dituzte bisitariek”. Halaber, bertako elkarteek, besteak beste, Azeri Elkarteak, Marlaxka Xake Elkarteak, edo Jaizubia Hipikak, tailer, ekintza eta haurrentzako jolasak antolatuko dituzte.
Goizez zein arratsaldez egongo da azoka bisitatzeko aukera: 10:00etatik 14:00etara eta 17:00etatik 21:00etara.
Azokaz gain, argazki lehiaketa berreskuratu dutela adierazi du Serranok. 2019an izan zen Erdi Aroko azokan ateratako argazki lehiaketaren azken edizioa. Aurtengo lehiaketarako deialdia laster luzatuko dute eta oinarriak udalaren webgunean ezarriko dituzte. Sari banaketa Hondarribiko jaietan egingo da.
