Marrazketa, pintura eta zeramika udako ikastaroak egingo dira
Marrazketan eta pinturan haur, gazte eta helduentzako eskaintza dago; zeramikan haur eta gazteentzat soilik. Izen emate batzuk zabalik dira.
Marrazketa eta Pinturako, eta zeramikako udal akademien udako programazioaren berri eman du gaur Kultura arloak.
Marrazketa eta pintura
Bi tailer eskainiko dituzte, bakoitza 16 ordukoa, bi orduko zortzi saiotan banatuta. Horietako bat haurrei zuzendutakoa da, eta bestea, gazte zein helduei.
Haurrek tailer bera egiteko bi egutegi proposamen dituzte: uztaileko lehen hamabostaldia (uztailaren 4tik 14ra) edota bigarren hamabostaldia (uztailaren 18tik 29ra). Bi kasuetan astelehenetik ostegunera izango dira saioak 10:30ean hasi eta 12:30ean bukatuko direnak. 6 urtetik gorakoek eman dezakete izena.
Ikastaroaren helburua sormena eta espresio plastikorako moduak sustatzea izango da, eta horretarako, nortasuna eta natura izango dituzte abiapuntu. Ikuspegi ludikotik sortu direla adierazi du udalak.
Gazteek eta helduek data aukera bakarra dute ikastaroa egiteko: uztailaren 11tik 21era. Kasu honetan ere astelehenetik ostegunera izango dira klaseak aire zabalean, 10:00etatik 20:00etara. Tailer honen xedea Bidasoko inguruneko paisaia ezagutzea da konposiziotik, marrazkitik eta orbanetik abiatuta.
Haur zein helduen ikastaroetarako izen ematea datorren asteko hilaren 6an irekiko da, ekainaren 17ra arte. Udal akademiara (Fabiola Erregina kalea 28) gerturatuta egin behar da astelehenetik asteazkenera, 17:00etatik 19:00etara; edota posta elektroniko honetara idatz daiteke, edo 695 75 29 94 edo 606 22 04 17 zenbakietara deituta.
Taldeak gutxienez 6 lagunetakoak izan behar dute eta gehienez 10. Tailerreko materiala ikaslearen kargu izango da eta ez da behar aurretik esperientzia edukitzea.
Zeramika
Uztailaren 4tik 28ra egingo da udako tailerra eta 5 eta 16 urte bitartekoentzat da. Izen emateko epea atzo hasi zen eta hilaren 16ra arte dago aukera. Klaseak astelehenetik ostegunera izango dira 10:00etatik 12:00etara.
Udal tailerrera joan beharko dute inskribatzera (Pikoketa karrika, 9) 10:30etik 12:30erako ordutegian astelehenetik ostegunetara, eta 15:00etatik 19:00etara astelehen eta asteazkenetan. Matrikulak 25 euro balio ditu eta 10 plaza eskaintzen dituzte.
