Podemos Ahal Duguk entzute prozesua martxan jarri du
Apirilean ekin zioten entzute prozesu honi eta hiriko agente, kolektibo eta eragile guztiekin biltzeko helburua dute.
Gaur goizean Miren Etxebeste, Eukene Lopez, David Nuño, Josetxo Arrieta, Maria Valiente eta alderdiaren zenbait militante eta jarraitzaile izan dira entzute prozesuaren prentsaurrekoan. Gaur goizean, Irungo Zabaltza plazan, Eukene Lopezek, David Nuñok eta Miren Etxebestek apirilean martxan jarri zuten entzute prozesuaren nondik-norakoak azaldu dituzte.
Azken urteetan pandemiaren, gerraren, inflazioaren, prezioen igoeraren eta krisi energetikoaren ondorioz, gizartearen egoera aldatzen ari dela azaldu du Eukene Lopez bozeramaileak. Hori dela eta, Miren Etxebesteren ustez “Irun errotik aldatu da eta hiriko kolektibo ezberdinak beren helburuak berrantolatzen ari dira”. Horrez gain, “ziurtasun eza eta politikan zein politikoengan konfiantza falta” sortu da. Horregatik guztiagatik hiritarrei gerturatzeko eta harremanak berreskuratzeko ahalegina egiten ari dira.
Egungo egoera abiapuntu hartuta talde moreak, apirilaren 5ean, entzute prozesu bat martxan jarri zuen. Dagoeneko sindikatu, animalista eta beste zenbait kolektiborekin bildu dira, baina “hasiera besterik ez” dela nabarmendu nahi izan du David Nuñok. Hiriko eragile, enpresa, merkatari, GKE, ikasle, kirolari, artisau eta finean, sektore guztietako kolektiboekin bilduko direla aurreratu dute.
Bilerekin Irungo egoera bertako agenteen ikuspuntutik ezagutzea eta konponbide “progresistak” elkarlanean bilatzea eta “sinergiak” sortzea da. Gainera, sektoreka ebaluazio bat egitea aurreikusi dute. Horrez gain, “ilusioa” sortu nahi dutela azaldu du Lopezek, egun dugun egoerari aurre egitea “posible” delako.
David Nuño zinegotziak azken urteetan jaso duten esperientzia balioan jarri eta Etxebestek, Irunek aurrera egiteko eta 2030 helburu iraunkorrak lortzeko “ausartak” izateko momentua dela adierazi du.
