Trainerilla Ligaren bigarren jardunaldia Hondarribiarentzat
Datorren astean, 3. eta 4. jardunaldiak jokatuko dira. Larunbatean (hilak 7), Hondarribian izango da, igandean, berriz, (hilak 8) Zarautzen.
Antxoaren Eguna estropada X.bandera. Ezkerretik eskuinera, goitik behera: Urko Redondo, Bikendi Alza, Alain Osanbela, Helene Sagarzazu, Ane Azpiroz, Intza Fernandez, Iñigo Vertiz, Mikel Orbañanos, Fernando Etxegarai, Joseba Amunarriz, Alex Udabe, Manex Alday, Jasone Mitxelena, Irati Camarero eta Gaizka Gorostiaga. Igande goizean, Getarian, Trainerilla Ligaren bigarren jardunaldian Antxoaren Eguna estropada X.bandera jokatu zen, eta Hondarribia A.E.ko arraunlariek irabazi zuten gizon zein emakumeetan. Lau luzeetara jokatu zen lehiaketa. Guztira 3.500 metro osatu behar izan zituzten biek ala biek. Itsasoa Getarian ohikoa dena baino bareago zegoen eta horri etekina ateratzen jakin izan zuten hondarribiarrek. “Itsaso ona zegoela ikusi genuen eta horrek lanak erraztu zizkigun” nabarmendu zuen Miren Garmendia Hondarribia Arraun Elkarteko patroiak.
Emakumeetan hiru ontziren arteko lehia izan zen, eta Hondarribiko neskek lehen postua eskuratu zuten, bigarren sailkatuari 20 segundoko aldea ateraz. Lehenengo ziabogara Zumaia Hondarribiaren aurretik iritsi zen. Baina bigarren luzean, hondarribiarrak zumaiarren trainerillaren aurretik jarri eta amaierara arte eutsi zioten postuari. Hondarribiaren helburua sentsazio onekin bukatzea izan zen eta “oso estropada polita” atera zela adierazi zuen patroiak.
- Sailkapena: 1. Hondarribia 16:09,29; 2. Zumaia 16:29,26; eta 3. Arraun Lagunak 16:53,58.
Gizonezkoetan, berriz, hamar trainerillek hartu zuten parte 2. jardunaldian. Hondarribiarrek 10 segundoko aldearekin erraz irabazi zuten estropada. “Oso estropada sendoa” egin zutela adierazi zuen Iñigo Vertizek eta “itsaso kondizio izugarriak” zeudela gaineratu zuen.
- Sailkapena: 1. Hondarribia ‘A’: 13:55,07; 2. Orio ‘A’: 14:10,35, 3. San Juan ‘A’: 14:32,41, 4. Zarautz ‘A’: 14:32, 41, 5. Getaria ‘A’: 14: 33,19, 6. Ur Joko ‘A’: 14.45,85, 7. Zumaia ‘A’: 14:48,49, 8. San Pedro ‘A’: 14:59,06, 9. Mutriku ‘A’: 15:05,73 eta 10. Illunbe: 16:01,31.
Datorren astean, 3. eta 4. jardunaldiak jokatuko dira. Larunbatean (hilak 7), Hondarribian izango da, igandean, berriz, (hilak 8) Zarautzen.
Guztira, 5 jardunaldi izango ditu Gipuzkoako Trainerilla Ligak. Halaber, 5. jardunaldia Gipuzkoako Trainerilla Txapelketa jokatzeko sailkapen estropada izango da. Bi hitzordu hauek Pasai Donibanen jokatuko dira.
Sailkapen osoa ikusteko hemen.
