Osasun Bidasoa proposatu dute sanmartzialetako pregoia egiteko
Elkarrekin Podemos-IUk egin du proposamena eta Irungo jaietako pregoia egitea "aintzatespen handia" izango litzatekeela azaldu du bozeramaileak.
David Nuño bozeramailea Osasun bidasoaren elkarretaratze batean. Elkarrekin Podemos-IUk Osasun Bidasoa proposatu du sanmartzialetako pregoia egiteko. Hain zuzen, plataformak Irungo eta Bidasoa eskualdeko interes orokorraren aldeko borrokan erakutsi duen konpromisoagatik. Irungo jaietako pregoia egitea “aintzatespen handia” izango litzatekeela azaldu du David Nuño bozeramaileak.
Osasun Bidasoak, hasieratik, Osasun Sailburuak proposatu zuen planarekiko desadostasuna agertu eta ospitaleko bloke kirurgikoa Bidasoa Ospitalean bertan geratzearen beharra defendatu zuten ospitaleko langileek. “Mobilizazioak eta protestak etengabeak izan dira” eta ondorioz, Eusko Jaurlaritzak erreklamazioak entzun eta hasierako plana aldatzea lortu dutela adierazi du Nuño bozeramaileak.
Horrengatik guztiagatik, “sanmartzialetako pregoia haien esku uztea” proposatu du Elkarrekin Podemos-IU taldeak.
Azkenik plataformarekiko babesa bermatzen jarraituko duela adierazi du talde ezkertiarrak. Horrenbestez, maiatzaren 9an Osasun Bidasoa Plataformak Eusko Legebiltzarrean egingo duen agerraldian parte hartuko dutela adierazi dute.
