Berriz eskatu ditu udalak giza korridore seguruak
Atzo agertu zen duela hiru aste Bidasoa ibaian itota hil zen migratzailearen gorpua, eta hori ekidite aldera, giza korridore seguruak behar direla adierazi dute.
Atzo Bidasoa ibaian agertutako hilotza migratzen zebilen pertsona batena dela baieztatuta “atsekabe handia” adierazi du Hondarribiko Udalak. Era berean, doluminak eman dizkie haren ingurukoei eta etxekoei.
Pertsona migratzaileek bizi duten injustizia egoeraren ondorioa dela jazotakoa salatu dute, eta Hondarribiak, Bidasoaldeak, Gipuzkoak eta Euskadik pertsona zaurgarrienen beharrei erantzuten lagundu nahi dietela uste dute.
Giza korridoreez mintzatu dira berriz ere eta horrelako bide seguruak irekitzea behar dela adierazi dute. Horren harira, Ukrainatik datozenen drama oroitu nahi izan dute.
Azkenik, erakundeen arteko lankidetza eta koordinazioa “inoiz baino garrantzitsuagoa” dela esan dute, eta horretan laguntzeko prest dagoela udala azaldu dute, “pertsona ahulenen beharrei erantzuteko”.
