Udal udalekuetan izena emateko epea irekiko dute astelehenean
Zozketan parte hartzeko eskaerak apirilaren 4tik 10era bitarte egin beharko dira, eta behin betiko izen ematea, maiatzaren 2tik 8ra. Esleipenen berri apirilaren 28an emango dute.
Udabentura bi txandatan egingo da eta Uda Jolas bakarrean. Urtero lez udalekuak antolatu ditu udalak; Udabentura, 12 eta 14 urte artekoentzat, eta Uda Jolas, 5 eta 11 urte bitartekoentzat. Pandemia aurretik zuen izaera bueltan izango du, eta gaur xehetasun guztien berri emateko agerraldia egin du Maria Serrano Gazteria zinegotziak.
Txandak eta ordutegiak
Udabentura bi txandatan egingo da, eta bakoitzean 50 gaztek parte hartuko dute. Lehenengoa uztailaren 1etik 14era egingo da, eta bigarrena uztailaren 15etik 29era, biak ala biak Talaia Biterin.
Bestalde, gurasoen eskaerei jarraiki erabaki dute Uda Jolas berriz hilabete osokoa izatea berriz. Beraz, uztailaren 4tik 29ra egingo dira plaza kopuru handiagoarekin, hau da, 220 haurrekin, eta ohi moduan Talaia Bordarin.
Kontziliazioari buruz ere jorratu da Serrano, izan ere, guraso batzuk udalekuak lehenagotik hasteko eskaria egin dutela azaldu du, baina aisialdirako programa bat dela nabarmendu nahi izan du: “Berriro ere mahai gainean jarri nahi dugu programa honen helburua dela haurrek udaran aisialdiaz disfrutatzeko aukera bat izatea modu antolatuan, baina ez da eskola. Udara da ere beraientzat”.
Ildo horretan, ordutegia luzatu egin dute eguerdi alderantz. Bada, 09:30ean hasiko da eta 13:30ean bukatu, bai Udabentura eta bai Uda Jolas.
Izen ematea eta prezioak
Izen emateko epea zabalik da apirilaren 4etik 10era bi kasuetan. Horretarako, gazteen zerbitzura gerturatu beharko dute interesdunek, edota udaleko inskripzio guneko orri horretan ere egin daiteke BakQ erabiliz.
Zozketaren emaitzak apirilaren 28an jakinaraziko dituzte, eta behin betiko izen ematea maiatzaren 2tik 8ra egin beharko da. Beste behin online eta BAZ bulegoetan zein gazte zerbitzuan egiteko aukera eskainiko dute. Kuotari dagokionez, 140 eurokoa da helduenentzat, eta Uda Jolasena 80 eurokoa lehenengo seme alabarentzat, eta bigarrenarentzat 70 eurokoa.
