Prostituzioa indargabetzea eskatuko dute sozialistek, mozio baten bidez
Emakumearen Nazioarteko Egunaren harira egingo dute eskaera hau. Aboliziorako adostasun politiko eta sozialaren beharra nabarmenduko dute.
PSE-EE-k bi mozio aurkeztuko ditu ostiraleko Osoko Bilkuran. Horietako bat, adinekoek pairatzen duten arrakala digitalari buruzkoa da, eta bestearekin, emakumeen sexu esplotaziorako prostituzioa eta salerosketa abolitzeko adostasun politiko eta sozial baten beharra eskatuko dute, martxoak 8 dela eta. “Horiek baitira gure herrialdeko desberdintasunagatiko adierazpen krudelenak eta bortitzenak. Are gehiago, administrazioek prozesu horretan duten zeregina ere aztertu nahi da”.
Iosu Alvarez sozialisten bozeramaileak adierazi du abolizioaren alde daudela, eta udalbatzari galdegingo dio Espainiako Gobernuari eska diezaiola sexu esplotaziorako gizakien salerosketari buruzko lege bat garatzea, prostituzioa indargabetzeko xedez. Era berean, prostituzioaren abolizioa gauzatzeko sentsibilizazio eta prestakuntza neurriak sustatzea nahi dute.
Sozialisten arabera, azken sei urteetan, 100 emakume baino gehiago identifikatu ditu Polizia Nazionalak Gipuzkoako etxeetan esplotazioa jasan zutenak. Gogoz kontra dabiltzanak aurkitzea “beharrezkoa” dela defendatu dute. “Funtsezkoa da behartuak eta gehiegizko baldintzapean daudenak aurkitzea. Emakume horiek esplotatu ez ezik, behartu eta mehatxatu ere egiten dituzte mafiek”.
Oposizioko taldeak emandako datuekin jarraituz, Nazio Batuen Erakundeak Espainia dela emakume eta neska gehien prostituitzen dituena adierazi du. “Izan ere, Europar Batasuneko beste herrialdeekin alderatuta zerrendaburu da Espainia, gizonen % 39 prostituta batekin egon dira bizitzan behin, alde handiarekin gainerako herrialdeekiko, alegia, Europako batez bestekoarekiko”.
