Izapideak egiteko bulego birtuala aurkeztu du Txingudi Zerbitzuak-ek
Aurrez aurreko arretak bere horretan jarraituko duela jakinarazi du Jose Antonio Santano Txingudi Zerbitzuaken lehendakariak.
Abenduan jarri zuen martxan Txingudiko Zerbitzuak-ek (Txinzer) bulego birtuala, eta bertan hainbat izapide “modu erraz eta irisgarrian” egiteko aukera eskaintzen da. Gaur plataforma hori aurkezteko eta horren balorazioa egiteko agerraldia egin dute Jose Antonio Santano Txinzerreko lehendakariak, Txomin Sagarzazu lehendakariordeak eta Leire Zubitur gerenteak.
Adin eta profil guztietako pertsonek erabiltzeko diseinatutako plataforma dela adierazi du Santanok, eta gaineratu du ahalegin berezia egin dutela “erabilerraza eta edozein gailutatik irisgarria” izan dadin. Hala ere, nabarmendu du sistema horrek ez duela aurrez aurreko arreta ordezkatuko, eta Junkal karrikako bulegoak zabalik daudela gogoratu du, “betiere 900 119 384 telefono-zenbakiaren bidez aurretiko hitzordua eskatzen badute”.
Oro har, digitalizazio prozesu batean murgilduta dagoela Txinzer adierazi du Sagarzazuk, eta bilakaera hau ingurumenarentzat eta abonatuentzat onuragarria izango dela uste du. Ildo horretan, plataforma horrekin segurtasuna irabazi dela esan du, “izan ere, faktore bikoitza sartu dugu: pasahitza eta telefono mugikor batera bidaliko den gakoa, eragiketak kautotzeko”.
Era guztietako izapideak egin daitezke sistema horren bidez, hala nola, ur kontsumoen kontsulta, kontagailuaren irakurketak eta instalazioaren datuak; edukiontzien bilaketa eta hondakinak biltzeko datuak; kontratuen kontsulta eta aldaketa.
Aplikazioan alta eman beharra dago erabili ahal izateko, eta horretara animatu ditu herritarrak Zubiturrek. Zehaztu du, aurreko abonatuaren atarian alta emanda zeudenek (3.500 pertsona, gutxi gorabehera) eta lehen aldiz izena eman nahi dutenek urrats batzuk jarraituko beharko dituztela: “Dagoeneko alta emanda zeuden pertsonek sistema eguneratu beharko dute, webean adierazten zaizkien urratsei jarraituz, eta gainerakoak modu errazean erregistratu ahal izango dira, galdetegia osatuz”.
