Espainiako Kopako final faserako sailkatu da Bidasoa
Benidormen kontrako partidua galdu arren (27-26) joaneko partidako garaipen sendoari esker, final fasean izango da talde irundarra.
Bidasoa. Argazkia: Twitter, Edwin van t Hek. CD Bidasoa. Bidasoak ilusioa pizten jarraitzen du, eta, oraingoan, Espainiako Kopako final faserako sailkatzea lortu du. Atzo, Benidormen kontrako azken partidua galdu arren (27-26), joaneko partidako zazpi goleko errenta nahikoa izan da sailkapena eskuratzeko.
Edozein modutan, Jacobo Cuetaren mutilak garaipena eskuratzera irten ziren kantxara. Lehen zatia oso berdindua joan zen, eta bi goleko errentaren maila ezin izan zuen ez batak ez besteak igaro ahal izan. Hiru aldiz jarri ziren irundarrak aurretik, baina atsedenaldian markagailua etxekoen aldekoa zen (13-12).
Bigarren zatian jokalari bat gutxigorekin jokatu zituen lehen minutuak, baina, hala ere, markagailuari eutsi zion Bidasoak. 10 minuturen faltan, gainera, aurretik jartzea lortu zuten irundarrek: 21-22. Azkenean, ordea, etxeko taldeak buelta eman zion markagailuari.
Etzi izango du hurrengo partidua Bidasoak. Artalekun izango da Frigorificos Morrazoren kontra.
