Torturaren egia argitara eramateko eskatuko dute igandean
Torturetan oinarritutako Iratxe Sorzabalen epaiketaren eta otsailaren 13ko Torturaren Aurkako Eguna dela eta, kalera irteteko deia egin du Sortuk igandean.
Torturaren Aurkako Egunean elkarretaratzea egingo dute Irunen. Torturaren egia argitara eramateko eskatuko dute igande honetan, San Juan plazan egingo duten elkarretaratzean, 12:00etan. Irungo Sortuk egin du deialdia, Iratxe Sorzabalen epaiketa ate joka dagoela eta otsailaren 13a Torturaren Nazioarteko Eguna dela kontuan hartuta. Hain zuzen, Sorzabalen auzia tortura latzetan oinarritutako testigantzak baldintzatutakoa dagoela gogorarazi du.
Sorzabalez gain, Euskal Herrian hainbat hamarkadetan zehar milaka lagunek pairatutako torturak ere gogora ekarriko ditu: “Izan ere, Espainiar Estatuak sistematikoki erabili du tortura euskal militanteon aurka, inpunitate osoz, kondena amaigabeak, oinazeak, sufrimendua eta heriotzak eraginez”.
Irunen, zehazki, 71 lagunek jasan dituzte torturak Sorturen arabera; 5.657 izan dira Euskal Herrian.
Hala, torturatu horiek guztiak gogoan izango dituzte igandean, eta “aitortza, erreparazioa eta ez errepikatzeko bermeak” aldarrikatuko dituzte.
