Hilaren 25a eta 28a, greba egunak Osakidetzan
Eusko Jaurlaritzako Osasun Sailaren eta Osakidetzako zuzendaritzaren "immobilismoa" salatuko dute sindikatuek bi egunetan.
Irailean LAB sindikatuak Dunboa anbulatorioan egindako mobilizazio bat. Irudia: LAB OarsoBidasoa. Eusko Jaurlaritzako Osasun Sailaren eta Osakidetzako zuzendaritzaren “immobilismoa” ikusita, mobilizazioetara joko dute berriro Osakidetzako sindikatuek. SATSEk, ELAk, LABek, CCOOk eta UGTk gaur Bilbon iragarri dutenez, bi greba egun egingo dituzte otsailaren bukaeran: hilaren 25ean lehen arretan (anbulatorioetan) izango da lanuztea, eta 28an Osakidetza osoan. Bi egun horien artean, hilaren 26an, manifestazioak antolatuko dituzte Bilbon, Gasteizen eta Donostian, 12:00etan, osasungintza publikoaren defentsan.
Bilboko agerraldian sindikatuek salatu dute Osasun Sailak edukiz hustu duela mahai sektoriala, eta horretan ez dutela gehiago parte hartuko iragarri dute. Gainera, txalotu egin dute herritarrek orain arteko mobilizazioetan emandako erantzuna, eta hilaren 26ko manifestazioetan parte hartzera deitu dituzte, “osasun publiko, unibertsala, doakoa, kalitatezkoa eta irisgarria defendatzeko”.
