Lazkanotegi zesta puntista hondarribiarrak, Udazken Txapelketako finala jokatuko du bihar
Eskola kiroleko txapelketa honetako haurren binakako finala jokatuko du Hondarribia Pilota Eskolako gazteak, Arrizabalaga mutrikuarrarekin batera, eta Elezgarai eta Watkins (Danok Bat) izango dituzte aurkari.
Zesta puntako Udazken Txapelketa bukaerara iristen ari da, eta A multzoko kimu eta haurrek, ostiral honetan jokatuko dute finala Mutrikuko Miruaitz pilotalekuan. B multzokoek jada jokatu zuten finala urtarril hasieran Tolosan, eta haurretan, Agirregomezkorta (Danok Bat) eta Zeberiok (Hondarribia) osatutako bikoak irabazi zuen. Kimuetan, berriz, Beristain eta Juaristi, Danok Bat taldekoak izan ziren garaileak.
Eskola kiroleko txapelketa da, eta eskolaz kanpoko jarduerei eragin zien dekretu baten aginduz, bertan behera utzi zen Tolosan egin behar ziren final hauek. Azkenean, baimendu zituzten eskola kiroleko jarduerak, eta finala Tolosan egitea “ezinezkoa denez”, Mutrikun egitea erabaki dute.
Ostiraleko A multzoko final hauetan, beraz, kimu eta haurren multzoetako finalak jokatuko dira. Lehenik, Mendizabalek (Donostia) eta Enbilek (Zumaia) osatutako bikotea Paniaguaren (Danok Bat) eta Goñiren (Zumaia) aurka arituko dira kimuetan. Ondoren, haurretan, Elezgarai (Danok Bat) eta Watkins (Zumaia) bikoteak, Lazkanotegi (Hondarribia) eta Arrizabalagaren (Danok Bat) kontra jokatuko dute. Bi setera jokatuko dira bi finalak.
