Jaizkibel urbanizazioa, egindako lanen aurretiko egoerara itzultzea eskatu dute sozialistek
Hirigintzaren legezkotasuna urratzen dutela egindako lanek salatu dute, eta udaleko Hirigintza Sailak hori hala dela egiaztatu duenez, ingurua lehengo egoerara itzultzea eskatu dute.
Elbistietatik Arrutarako bidean, kateak jarri dituztela salatu dute sozialistek.
Sozialistek, Jaizkibel urbanizazioan lizentziarik gabe sei zaintza kamara jarri izana eta debekatuaren norabidearen seinaleak, eta honekiko administrazioaren isiltasuna salatu dituzte.
Hondarribiko Udaleko Hirigintza Sailak, egindako lanak hirigintza legezkotasunera egokitu gabe egin direla egiaztatu zuen. Horregatik, hirigintza legezkotasuna aplikatzea, eta inguru hori, aurretik zegoen egoerara bueltatzea eskatu dute.
Iazko maiatzean, PSE-EEren hitzetan, Udaltzaingoak parte bat idatzi zuen, lan hauek lizentziarik gabe eta hirigintza legezkotasunarekin bat egin gabe burutu zirela jakinarazteko. U647-04 agindua urratu dela ere diote, eta honen arabera, jarri dituzten trafiko seinaleak kentzera behartuta daude, “ez dira kendu, baizik eta ezarri dira”, azaldu dute.
Halaber, 2019ko martxoan, 375 sinadura bildu zirela oroitu dute, Elbistietatik Arrutara, Aginasasi baserrira eta Jaitzubiako inguruetako bideak kateen bidez ixtearen aurka.
